24 dekabr 2024-cü ildə Bakı Fond Birjasında "ABB” ASC-nin sənədsiz, adlı, faizli, təmin edilməmiş istiqrazlarının yerləşdirilməsi üzrə hərrac keçirilib.

Daha öncə Bakı Fond Birjasının “Premium” bazar seqmentində listinqə daxil edilmiş bu qiymətli kağızların ümumi həcmi 100 milyon manat təşkil edir.

ABB-nin yaydığı məlumatda bildirilir ki, istiqrazların emissiyası rəqabətli hərrac üsulu ilə həyata keçirilib. Təklif olunan istiqrazların hər birinin nominal dəyəri 100 manat, tədavül müddəti 2 il təşkil edir. İstiqrazlar investorlara illik 11% gəlirlilik təmin edəcək. Bu istiqrazlar üzrə faiz ödənişləri hər 3 (üç) təqvim ayından bir həyata keçiriləcək. Ödəniş tarixi qeyri-iş gününə təsadüf etdikdə, faiz ödənişi növbəti ilk iş günü tamamlanacaq.

Bu istiqrazların buraxılışı mütəşəkkil kapital bazarından sərbəst vəsaitlərin cəlb edilməsi ilə bankın aktivlərinin və pul vəsaitlərinin resurs bazasının diversifikasiyasının artırılması, ortamüddətli maliyyələşmənin təmin olunması, eləcə də ölkəmizin qiymətli kağızlar bazarının inkişafına töhfə vermək məqsədilə həyata keçirilib.

Emissiyadan əldə olunan vəsait ABB-nin kredit portfelinin artırılmasına, kredit bazarında mövqeyinin gücləndirilməsinə, eləcə də ABB-nin strateji layihələrinin icrasının maliyyələşməsinə yönəldiləcək. Əlavə olaraq, istiqraz buraxılışından cəlb olunmuş vəsaitlər ölkə daxilində sərfəli və keyfiyyətli bankçılıq xidmətləri təklif etməklə regionlarda real iqtisadiyyatın maliyyələşdirilməsinə, bölgələrdə iqtisadi rifahın və məşğulluğun artırılmasına müsbət təsir göstərəcək.

Buraxılışın anderrayteri qismində “ABB-İnvest İnvestisiya Şirkəti” QSC çıxış edib. İstiqrazlar artıq sabahdan etibarən Bakı Fond Birjasında təkrar bazarda tədavülə buraxılacaq. Təkrar bazardan bu istiqrazları əldə etmək niyyətində olan investorlar “ABB-İnvest İnvestisiya Şirkəti” QSC-ə müraciət edə bilər.

XXX

Bakı Fond Birjasının yaydığı məlumatda da bildirilir ki, 24 dekabr 2024-cü il tarixində Bakı Fond Birjasında "Azərbaycan Beynəlxalq Bankı" ASC-nin 100 milyon manatlıq istiqrazlarının yerləşdirilməsi üzrə hərrac yekunlaşmışdır. 

İstirazlara 9 investor tərəfindən 9 sifariş təqdim olunub. İstiqrazlar  tam həcmdə yerləşdirilib.

İstiqrazlar üzrə məlumatlar aşağıdakı kimidir:

Emitentin adı: "Azərbaycan Beynəlxalq Bankı" ASC

Dövlət qeydiyyat nömrəsi – İSİN: AZ2002004581

İstiqrazların növü və forması: İstiqrazlar faizli, təmin edilməmiş sənədsiz adlı

Ticarət üsulu/forması: Kütləvi / Rəqabətli

İstiqrazların sayı: 1 000 000 (ədəd)

İlkin ticarət qiyməti: 100 manat

İstiqrazların buraxılış həcmi: 100 000000 manat

İllik gəlirlilik faizi: 11%

Minimal qiymət: 100 (11.00%) manat

Maksimal qiymət: 100 (11.00%) manat

Kəsmə qiyməti: 100 (11.00%) manat

Ortaçəkili qiyməti: 100 (11.00%) manat

İstiqrazların reallaşdırılmış həcmi: 100 000 000 manat

İstiqrazların sifarişlərinin ümumi həcmi (nominal qiymətlə): 100 000 000 manat

İnvestor sayı: 9

Sifariş sayı: 9

Ödəmə Periodu: ildə günlərin sayı 360 (üç yüz altmış) və bir ayda günlərin sayı 30 gün olaraq götürülməklə) hər 3 (üç) təqvim ayından bir

Tədavül müddəti: 24 ay

Anderrayter: “ABB-İnvest İ.Ş” QSC