Türkiyənin Rəqabət Qurumu, "DSM Group Consultancy Communication and Sales Trade Inc." (Trendyol brendi) şirkətinin satıcılara təklif edilən Avtomatik Qiymət Mexanizminin rəqabət qanununu pozub-pozmadığı ilə bağlı araşdırmanı başa çatdırıb.

Marja.az xəbər verir ki, Qurum, şirkətin öhdəlik götürməsi nəticəsində Trendyol-un Avtomatik Qiymət Mexanizmi ilə bağlı başlatdığı araşdımaya xitam verib. Müvafiq olaraq, şirkət satıcılardan avtomatik qiymət mexanizmindən istifadə etməyə məcbur etməyəcək.

Açıqlamada, araşdırmaya xitam verilməsinə səbəb kimi Trendyol-un təklif etdiyi öhdəliklərin rəqabət problemlərinin həlli üçün yetərli sayılması göstərilib.

Qeyd edək ki, elektron ticarət dünyasında rəqiblərinizlə qiymət rəqabətində həmişə bir addım öndə olmaq biznesinizin uğuru üçün çox vacibdir. Avtomatlaşdırılmış qiymət sistemi bunun üçün təklif olunur. Belə ki, platforma daim rəqibləri izləyir. Bu sistem qiymətlərinizi təyin etdiyiniz qaydalara uyğun olaraq avtomatik olaraq yeniləyərək rəqiblərinizin hərəkətlərinə anında cavab verə bilir.

Trendyol, sadə şəkildə desək, onlayn bazardır. Şirkətlər (satıcılar) bu bazarda yer alaraq məhsullarını alıcılara təklif edirlər.

Açıqlamaya görə, satıcılar üçün Trendyol-un avtomatlaşdırılmış qiymət mexanizminin istifadəsi məcburi olmayacaq və Şirkət hər hansı stimul təklif etməyəcək.

Trendyol avtomatik qiymət mexanizmindən “Buybox Fiyatına Eşitle” funksiyasını siləcək və satıcılara yalnız “Buybox Fiyatının Altında Kal” və “Buybox Fiyatının Üstünde Kal” seçimlərini təklif edəcək. 

Sistem, satıcıları avtomatik qiymət mexanizminin xüsusiyyətləri haqqında məlumatlandıracaq, lakin avtomatik qiymət mexanizminin istifadəsi ilə bağlı digər satıcıların məlumatlarını satıcılarla paylaşmayacaq.

Trendyoil avtomatlaşdırılmış qiymət mexanizminin işləməsi ilə bağlı təlim məzmununu satıcılar üçün əlçatan edəcək.

Trendyol, öhdəliklərə əməl olunmasına nəzarəti təmin etmək üçün 3 il müddətində Rəqabət Qurumuna hesabat təqdim edəcək.