“Goldman Sachs” qlobal neft bazarı ilə bağlı son təhlilində qeyd edib ki, “Brent” markalı xam neftin qiyməti yaxın illərdə əhəmiyyətli dərəcədə düşə bilər.

Marja.az xəbər verir ki, Bankın əmtəə analitikləri Donald Tramp prezident seçildikdən sonra tarif siyasətini həyata keçirərsə və ya OPEC+ qrupu hasilatı artırarsa, 2026-cı ilin sonuna qədər qiymətlərin bir barel üçün 60 dollardan aşağı düşə biləcəyini proqnozlaşdırırlar. Bu proqnoz 2024-cü ildə cari qiymətlərdən təxminən 20 faiz, orta hesabla 80 dollar/barel qiymətdən isə 25 faiz aşağıdır.

Tələb və təklif dinamikası qiymətlərə təzyiq edir

Goldman Sachs-ın təhlilinə görə, neft təklifinin artması və tələbin məhdud artımı bu il qiymətlərə aşağı istiqamətli təzyiq göstərib. Hesabatda, "Daha yüksək gömrük tarifləri neftə tələbata mənfi təsir göstərə bilər. Həmçinin neft ehtiyatının çoxluğu da qiymətlərə aşağı istiqamətdə təsir edir" deyilir.

Analitiklər Trampın Çindən idxal olunan mallara 60%, digər ölkələrə isə 10-20% gömrük rüsumunun tətbiq edilməsi təklifinin qlobal ticarətə ciddi mənfi təsir göstərə biləcəyini vurğulayıblar.

Goldman Sachs-ın qiymət proqnozu ABŞ-ın ümumiyyətlə 10% tarif tətbiq edəcəyi ehtimalını ehtiva edir. Bankın təhlilinə bənzər şəkildə, Bank of America strateqi Francisco Blanch keçən həftə Trump-ın təklif etdiyi tariflərin qlobal ticarəti məhdudlaşdıracağını, tələbi və qiymətləri aşağı salacağını söyləyib. "Trampın siyasəti birinci Amerika, ikinci əmtəə deməkdir,-" Blanch deyib.

ABŞ-ın neft hasilatı rekord səviyyədədir

Trampın seçki kampaniyası zamanı "neft hasilatının daha da artırılması və enerji qiymətlərinin aşağı salınmasını" vəd edib. Avqustda ABŞ-ın neft hasilatı gündəlik 13,4 milyon barrelə çataraq yeni aylıq rekorda imza atıb. Tramp  strategiyasını “Biz yeni quyular qazacağıq və daha çox istehsal edəcəyik” sözləri ilə izah edib.

Qısa müddətdə yüksəliş ehtimalı

Goldman Sachs-ın analitikləri qısa müddətdə qiymətlərin məhdud artımını proqnozlaşdırırlar. Bildirilir ki, İrana qarşı neft sanksiyaları sərtləşdirilərsə, Brent markalı neftin qiyməti 2025-ci ilin ortalarına qədər 83 dollar/barelə qədər yüksələ bilər. Lakin bu artımın müvəqqəti olacağı və qiymətlərin il boyu normallaşaraq orta hesabla 76 dollara düşəcəyi təxmin edilir.

Analitiklər, uzunmüddətli perspektivdə ABŞ və Çin kimi əsas iqtisadiyyatlarda tələbin durğunluğu səbəbindən qiymətlərin yenidən təzyiq altında qalacağı proqnozlaşdırırlar.