ABŞ Ədliyyə Nazirliyi (DoJ) Google-un bazardakı hökmranlığına son qoymaq üçün hazırlanmış 23 səhifəlik sənəddə şirkətin bölünməsini və bəzi mühüm məhsullarının satışını təklif edib. Bu çərçivədə Chrome brauzerinin satışı və Android əməliyyat sisteminə məhdudiyyətlərin qoyulması gündəmdədir.

Marja.az-ın məlumatına görə, Nazirlik bəyan edib ki, bu addımlar Google-un axtarış sistemindəki monopoliyasına son qoyacaq və rəqib axtarış sistemlərinin daha ədalətli rəqabət mühitində fəaliyyət göstərməsinə şərait yaradacaq.

DoJ hüquqşünasları, Chrome-un satışının Google-a istifadəçilərin internetə qoşulduğu mühüm şlüz üzərində nəzarəti itirməsinə imkan verəcəyini qeyd ediblər. Həmçinin bildirilib ki, Android Google-un axtarış sisteminə üstünlük verməyi dayandırmalıdır. Əks halda, Google- Android mobil əməliyyat sistemini də satmalıdır. Nazirlik həmçinin təklif edib ki, axtarış nəticələri müstəqil şəkildə yayılsın və Google rəqib axtarış sistemlərini və süni intellekt təşəbbüslərini dəstəkləmək üçün klik və sorğu məlumatlarını satsın.

Google-dan sərt reaksiya

Google, Keyword bloqunda verdiyi açıqlamada DoJ-nin təklifini "şokedici" adlandırıb və bunun həm istehlakçılara, həm də ABŞ-ın texnologiya liderliyinə zərər verəcəyini iddia edib.

Google-un Qlobal Məsələlər üzrə Prezidenti və Baş Hüquq Mütəxəssisi Kent Uolker deyib: "DoJ amerikalılara və Amerikanın qlobal liderliyinə zərər verəcək radikal müdaxiləçi gündəmi irəli sürməyi seçdi".

Uolker, bu təkliflərin təkcə axtarış sisteminə deyil, istifadəçilərin gündəlik həyatlarında geniş istifadə etdikləri bir çox Google məhsullarına da mənfi təsir göstərəcəyini bildirib.

Google-a qarşı bu proses 2020-ci ildə Ədliyyə Nazirliyi və bir çox ştatlar şirkətin cihaz istehsalçılarına milyardlarla dollar ödəməklə axtarış sistemini defolt etdiyi iddiası ilə məhkəməyə müraciət etdikdən sonra başlayıb. Bu ilin avqustunda federal hakim Amit Mehta Google-un rəqabətsiz qiymətlər tətbiq etməklə axtarış motorları bazarındakı hökmranlığından sui-istifadə edərək monopolist olduğunu müəyyən edib.

Hazırda Google dünya üzrə axtarışların 90 faizindən çoxuna nəzarət edir və gündə təxminən 9 milyard axtarışı emal edir.

Ədliyyə Nazirliyinin Google-ı bölmək təklifləri hakimin qərarına əsaslansa da, gələcək idarəetmə dəyişiklikləri Nazirliyin yanaşmasına təsir göstərə bilər. Google təkliflərə reaksiya verərkən milli təhlükəsizlik riskləri, məlumatların xarici şirkətlərə açıqlanması və dövlətin texnologiyaya müdaxiləsi kimi məsələlərə diqqət çəkib.