ABŞ Mərkəzi Bankı (FED) uçot dərəcəsini sentyabrda 0,50 faiz bəndi azaltdıqdan sonra noyabrda da 0,25 faiz də azaltdı. İndi diqqət dekabr toplantısındadır.

ABŞ Federal Ehtiyat Sistemi (Mərkəzi Bank, FED) uçot dərəcəsini 0,25 faiz bəndi azaldaraq illik 4,50% - 4,75%-ə qədər endirib. Bu, FED-in 2024-cü ildə ikinci dəfə faiz endirimi qərarıdır. FED sentyabr ayında da uçot dərəcəsini 0,50 faiz bəndi endirib. İnflyasiya hələ də 2% hədəfindən bir qədər yuxarı qalmasına baxmayaraq, FED inflyasiya və məşğulluq hədəflərinə çatmaq üçün risklərin təxminən balanslaşdırılmış olduğuna inanır.

Marja xəbər verir ki, dünən faiz qərarından sonra keçirilmiş mətbuat konfransında FED sədri Jerome Powell (Cerom Pauel) iqtisadiyyat, seçkilər və onun istefası ehtimalı haqqında danışıb.

FED sədri Cerom Pauel mətbuat konfransı zamanı inflyasiyanın "əsaslı şəkildə azaldığını" və 2%-ə qədər "dayanıqlı bir yolda" göründüyünü söyləyib. Bununla belə, rəsmi vurğulayıb ki, ümumi inflyasiyası hədəfə yaxınlaşsa da, baza inflyasiyası hələ də “bir qədər yüksəlib”.

Pauel hesab edir ki, əmək bazarı hazırda əhəmiyyətli inflyasiya təzyiqi mənbəyi deyil. Maaş artımı qismən keçən ayki qasırğaların təsiri ilə yavaşlayıb və işsizlik səviyyəsi bir il əvvələ nisbətən nəzərəçarpacaq dərəcədə yüksəkdir, lakin 4.1% səviyyəsində "aşağı" olaraq qalır.

Pauell iqtisadiyyatın FED-in faizləri azaltmağa tələsməməsi üçün kifayət qədər sabit olduğunu vurğulayıb. O, hətta dekabrda keçirilən iclasda uçot dərəcəsinin azaldılmasında fasilə olacağını istisna etməyib.

 FED sədri, "Gözləyib dekabrda işlərin necə getdiyini görəcəyik. Sadəcə gözləmək və məlumatların bizi hara aparacağını görməliyik",- deyib.

Faizlər neytral səviyyəyə yaxınlaşdıqca, FED pul siyasətinin yumşaldılması tempini yavaşlata bilər. Pauel təkrarlayıb ki, o, çox sürətli və ya çox yavaş faiz endiriminin təhlükələrini dərk edir. Faizlərin sürətli azaldılması inflyasiyanın azaldılmasında irəliləyişə mane ola bilər. Həmçinin faizlərin çox ləng azaldılması "iqtisadi aktivliyi və məşğulluğu lazımsız şəkildə zəiflədə bilər" deyib.

Gözlənildiyi kimi, Pauell yeni Tramp administrasiyasının iqtisadi siyasətini birbaşa şərh etməkdən çəkinib. Pauell bildirib ki, seçkilər yaxın müddətdə FED-in qərarlarına "heç bir təsir göstərməyəcək". Amma tənzimləyicinin rəhbəri etiraf edib ki, zaman keçdikcə hökumətin və Konqresin hərəkətləri ABŞ iqtisadiyyatına təsir edə bilər və FED bunu öz proqnozlarında nəzərə alacaq.

Lakin Pauell bildirib ki, prezident ondan istefa verməsini istəsə, istefa verməyəcək. FED-in hazırkı sədrinin səlahiyyət müddəti 2026-cı ilin mayında başa çatır və Pauellin Trampın təzyiqi ilə daha tez vəzifəsini tərk edə biləcəyi ilə bağlı fikirlər var. Lakin Cerom Pauell xatırladıb ki, qanuna görə, prezident FED rəhbərini vəzifəsindən azad edə bilməz.