Sentyabrın 29-da başa çatan üç aylıq dövrü maliyyə təqvimində dördüncü rüb hesab edən qəhvəxana şəbəkəsi Starbucks, balans hesabatını açıqlayıb.

Marja xəbər verir ki, Starbucks-ın qlobal müqayisəli mağaza satışları sözügedən dövrdə 7% azalıb.

Şirkətin satışları Şimali Amerika və ABŞ-da 6 faiz, beynəlxalq bazarlarda isə 9 faiz azalıb. Starbucks-ın Çindəki satışları da 14 faiz azalıb.

Starbucks-ın gəliri iyul-sentyabr dövründə illik müqayisədə 3 faiz azalaraq təxminən 9,1 milyard dollara düşüb. Şirkətin səhmbaşına qazancı keçən ilin eyni dövrü ilə müqayisədə 25 faiz azalaraq 80 sent olub.

Bu dövrdə şirkətin gəliri və mənfəəti bazar proqnozlarından aşağı olub.

“Müştəriləri geri qaytarmaq üçün strategiyamızı dəyişməliyik”

Starbucks-ın 2024-cü ilin tam maliyyə ilində qlobal müqayisə edilə bilən mağaza satışları 2 faiz azalıb.

Şirkətin maliyyə ili üçün müqayisə olunan mağaza satışları Şimali Amerika və ABŞ-da 2 faiz, beynəlxalq bazarlarda 4 faiz və Çində 8 faiz azalıb.

Starbucks-ın bu dövrdəki gəliri 1% artımla 36,2 milyard dollar olaraq hesablanıb.

Şirkətin Baş İcraçı Direktoru (CEO) Brayan Nikkol maliyyə nəticələrini qiymətləndirərkən müştəriləri geri qaytarmaq üçün strategiyalarını kökündən dəyişdirməli lazım olduğunu vurğulayıb və deyib: “Bizim aydın planımız var və Starbucks-ı geri qaytarmaq üçün sürətlə hərəkət edirik".

Starbucks-ın Baş Maliyyə Direktoru (CFO) Rachel Ruggeri də şirkətin uzunmüddətli böyüməyə qayıtmasını gözlədiyini bildirib. 

İsrailin Qəzzaya hücumları ilə əlaqədar olaraq etirazlar və boykot kampaniyaları ilə üzləşən şirkətlərdən biri də Starbucks-dır. Baykot Şirkətin maliyyə nəticələrinə son üç rübdə mənfi təsir göstərib.

Qəhvəxana şəbəkəsi, etirazlar və boykot kampaniyalarının Yaxın Şərqdəki mağazalardakı satışlara mənfi təsir göstərdiyi üçün illik satış proqnozunu aşağı salmışdı.

Yanvar-mart dövründə şirkətin gəlirləri 2 faiz azaldığı halda, qlobal satışları 4 faiz azalaraq 2020-ci ilin sonundan bəri ilk dəfə azalmışdı.

Starbucks, aprel-iyun dövründə qlobal satışlarının 3 faiz azaldığını bildirib.