Dövlət Gömrük Komitəsinin sədri, gömrük xidməti general-polkovniki Aydın Əliyevin Yevlax şəhərində ixracatçılarla görüşü keçirilib.

Komitədən verilən məlumata görə, A.Əliyev Azərbaycan iqtisadiyyatının inkişafında və qeyri-neft sektorunun şaxələndirilməsində özəl sektorun rolundan, eləcə də sahibkarlığın inkişafına göstərilən dövlət dəstəyindən bəhs edib. Gömrük orqanları tərəfindən xarici ticarətin asanlaşdırılması və daxili bazarın qorunması istiqamətində görülən işlər, gömrük ödənişləri zamanı sahibkarlara güzəştlər, göstərilən elektron gömrük xidmətləri haqqında məlumat verilib.

Gömrük sahəsində aparılan islahatlar barədə danışan DGK sədri görülən işlərə “elektron bəyannamə”yə keçid, “yaşıl dəhliz”in tətbiqi və sair işlərin daxil olduğunu bildirib. Qeyd olunub ki, yaradılmış şərait hesabına daxili bazarda yerli istehsalın çəkisi ildən-ilə artır, idxal-ixrac əməliyyatlarının tənzimlənməsi mexanizmi respublika iqtisadiyyatının dinamik inkişafına müsbət təsir göstərir.

A.Əliyev diqqətə çatdırıb ki, respublikada aqrar sektoru inkişaf etdirmək və ixrac potensialını artırmaq qarşıda duran mühüm vəzifələrdəndir. Bu istiqamətdə mühüm addımların atıldığını söyləyən Komitə sədri vurğulayıb ki, dövlət başçısının diqqət və qayğısı sayəsində ölkəmizin bütün regionları inkişaf edir, kənd təsərrüfatı sahəsində canlanma müşahidə olunur. Xüsusən meyvə-tərəvəz məhsullarının istehsalı və emalına toxunan Komitə sədri məlumat verib ki, 2017-ci ilin 7 ayı ərzində ötən ilin müvafiq dövrü ilə müqayisədə meyvə-tərəvəzin ixracında çəki nisbətində 62 faiz artım qeydə alınıb. Qeyd edilib ki, bu gün Azərbaycan üçün yeni, böyük bazarlar açılıb. Çin bazarına 360 milyon dollarlıq mal ixrac olunub. Bu isə meyvə-tərəvəz deyil, spirtli və spirtsiz içkilər və s. qeyri-neft məhsullarıdır ki, bu da qeyri-neft sektorunun inkişafı ilə bağlıdır. Digər ölkələrdən isə Bəhreyn, Küveyt və Səudiyyə Ərəbistanı Azərbaycanın yeyinti məhsullarına xüsusi maraq göstərir. 

Komitə sədri ölkədə gömrük rəsmiləşdirilməsinin tam şəffaf qaydada həyata keçirildiyini vurğulayıb, lakin yaradılan münbit şəraitə baxmayaraq, hələ də bəzi iş adamlarının gömrük vergi və rüsumlarından yayınmaq məqsədilə idxal etdikləri malların dəyərini aşağı göstərməyə çalışdıqlarını bildirib və onları qanunvericiliyin tələblərinə əməl etməyə çağırıb. 

Daha sonra iş adamları gördükləri işlər barədə məlumat verərək xarici iqtisadi fəaliy­yət­lə məş­ğul olan sahibkarlıq subyektlərinin dəs­təklənməsi məqsədilə gömrük orqanlarının fəaliyyətini dəyərləndirib, həmçinin sahibkarlıq fəaliyyətinin düz­gün istiqa­mət­lən­dirilməsilə bağlı bu cür görüşlərin keçirilməsinə görə təşəkkürlərini bildiriblər. 

Görüşün sonunda sahibkarları maraqlandıran suallar ətraflı cavablandırılıb.