"ABB İnvest İnvestisiya Şirkəti" kapital bazarının yeni liderinə çevrilib. Bu barədə "ABB İnvest İnvestisiya Şirkəti"nin (ABB İnvest) Korporativ müştərilərlə iş departamentinin direktoru Vüqar Tanırverdiyev məlumat verib. O, müsahibəsində "ABB İnvest"in uğurlu nəticələri və kapital bazarındakı lider mövqeyindən danışıb.

-"Vüqar müəllim, Bakı Fond Birjasının açıqladığı 9 aylıq hesabata görə "ABB İnvest İnvestisiya Şirkəti" apardığı əməliyyatların həcminə görə yerli investisiya şirkətləri arasında ilk sırada yer almış və bu göstəriciyə görə kapital bazarının liderinə çevrilmişdir. Bu barədə nə deyə bilərsiniz?

- Bəli, qürurla demək istəyirəm ki, bu göstərici “ABB İnvest”in 4 illik əziyyəti, çalışqanlığı və əlbəttə ki, müştərilərimiziin göstərdiyi yüksək etimadın nəticəsidir. Geridə qoyduğumuz dövrdə biz bütün səylərimizi müştərilərə göstərilən investisiya xidmətlərinin keyfiyyətinin artırılmasına yönəltməyə çalışmışıq. Xidmət keyfiyyətinin artması həm sifarişlərin operativ qaydada qəbulu və icrasında, həm də müştərilərlə qarşılıqlı kommunikasiyanın yüksək səviyyədə saxlanılmasında öz əksini tapmışdır. Bu isə öz növbəsində Şirkətin müştərilərinin sayının artmasının və eyni zamanda "ABB İnvest" üzərindən aparılan əməliyyatların həcminin böyüməsinə müsbət töhfə vermişdir. 

Həmçinin oxu

Birja üzvlərinin dövriyyələri açıqlandı - "ABB İnvest" 1-ci yerə keçib

- Bu yaxınlarda sizin digər layihəniz də uğurla nəticələndi, bu barədə nə demək istərdiniz?

- Yəqin ki, ABB səhmlərinin kütləvi təklifi və yerləşdirilməsini nəzərdə tutursunuz. Bəli, onu deyə bilərəm ki, bu layihə nəinki “ABB İnvest”in, o cümlədən bütün Azərbaycan kapital bazarının böyük bir uğuru kimi qeyd edilə bilər. Çünki 3 ay müddətində 34 minə yaxın investor ABB səhmlərinə investisiya edərək ölkənin ən iri və gəlirli bankının səhmdarına çevrildi və əlbəttə ki, bu özü rekord bir göstəricidir. “ABB İnvest” yerli kapital bazarının tarixində ilk dəfədir ki, sifarişlərin elektron şəkildə qəbulunu təşkil etdi və nəticədə qəbul edilmiş sifarişlərin böyük əksəriyyəti rəqəmsal sifarişlərin payına düşdü.

- Növbəti planlarınız və layihələriniz haqqında nə deyə bilərsiniz?

- Hazırda ən aktual məsələ ABB səhmləri ilə təkrar bazarda kütləvi ticarətin investorlar üçün maksimal dərəcədə əlçatan və rahat etməkdir. Əlbəttə ki, burada söhbət təkrar bazar əməliyyatlarının rəqəmsallaşmasından gedir. Artıq qeyd etdiyim kimi, biz ABB səhmlərinə abunə yazılışı prosesini “ABB mobile” tətbiqi üzərindən aparılması üçün investorları funksionallıqla təmin etdik. İndiki mərhələdə hədəf həmin investorlar üçün təkrar bazar sifarişlərinin də mobil tətbiq üzərindən elektron şəkildə qəbul edilməsi və icrası üçün müvafiq şəraitin yaradılmasıdır. Bu istiqamətdə texniki işlər tamamlanmaq üzrədir və yaxın bir neçə gün ərzində bu imkan da “ABB İnvest”in müştərilərinə təqdim ediləcəkdir. Ümid edirəm ki, müştərilərimiz bu fürsətdən də yararlana və faydalana biləcəklər.

- Sualları cavablandırdığınız üçün təşəkkür edirik və sizə gələcək fəaliyyətinizdə uğurlar arzulayrıq.