Dünən ABŞ-da daşınmaz əmlak bazarına dair göstəricilərin dərc olunması fonunda beynəlxalq birjalarda dollar major valyutalar qarşısında kəskin bahalaşdı. Lakin, bugün səhər saatlarında bir qədər ucuzlaşaraq, təzyiq altında qalmağa davam etdi. EUR/USD cütlüyü dünən gün ərzində 1.1213 həddini test etdikdən sonra 1.1121 həddinə qədər kəskin ucuzlaşdı. Hal-hazırda avro/dollar məzənnəsi 1.1145 səviyyəsində ticarət olunur. 

Bugün İsveçrə Milli Bankının faiz dərəcəsi ilə bağlı qərarı açıqlanacaq. Belə ki, mərkəzi bankın uçot dərəcəsini 1.25%-dən 1%-ə qədər endirməsi proqnozlaşdırılır. Ötən gün ərzində 0.8414 həddindən 0.8506 həddinə kimi kəskin bahalaşan USD/CHF cütlüyü açıqlanacaq xəbər ərəfəsində bir qədər ucuzlaşıb.

ABŞ-ın Ticarət Nazirliyinin verdiyi məlumata əsasən, ölkədə Yeni Mənzil Satışlarının Həcmi iyul ayı ilə müqayisədə avqust ayında 4.7% azalaraq 716 min mənzilə qədər enib. Bu, may ayından bəri ən kəskin azalma olub. Analitiklər göstəricinin 699 min mənzilə qədər enəcəyini proqnozlaşdırmışdılar. Eləcə də, avqust ayında tikinti üzrə verilən icazələrin sayı 1.406 milyondan 1.470 milyona qədər artıb. Ekspertlər göstəricinin 1.475 milyon səviyyəsinə qədər artacağını ehtimal etmişdilər.

Amerikada kommersiya məqsədli neft ehtiyatları ötən həftə 4.47 milyon barrel azalaraq 413.04 milyon barrelə qədər enib. Bu barədə ölkənin Enerji Departamentinin həftəlik hesabatında məlumat verilib. Göstəricinin proqnozların üzərində dərc olunması fonunda neftin qiyməti ucuzlaşmağa başlayıb. Belə ki, “Brent” markalı neftin bir barrel üzrə qiyməti 75$ səviyyəsindən 72.9$ səviyyəsinə qədər ucuzlaşıb. 

Bugün ABŞ-da İşsizlik Müavinəti üçün Müraciətlərin Sayı, ölkə ÜDM-i və Uzunmüddətli İstifadə üçün Nəzərdə Tutulmuş Məhsulların Sifariş Həcmi göstəriciləri investorların diqqət mərkəzində olacaq əsas hadisələrdir. Həmçinin, Bakı vaxtı ilə saat 17:20-də FED-in sədri Cerom Pavelin və saat 17:30-da AMB-nin sədri Kristin Laqardın çıxışları da bazar iştirakçıları tərəfindən maraqla gözlənilir.

Məlumat İnvest-AZ İnvestisiya Şirkətinin analitikləri tərəfindən hazırlanıb.