Naxçıvan Muxtar Respublikası Nazirlər Kabinetinin mətbuat xidmətinin yaydığı məlumatda bildirilir ki, “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”na uyğun olaraq Dövlət Energetika Xidməti tərəfindən elektrik yarımstansiyalarının yenidən qurulması istiqamətində işlər davam etdirilir.

Ötən əsrin 90-cı illərinin sonunda qurulan, qurğu və avadanlıqları uzun müddətdir istismar olunan sistem əhəmiyyətli 132/110/10 kilovoltluq “Culfa” yarımstansiyasının qidalandırıcı yüksəkgərginlikli elektrik xətlərinin yaşayış sahələrindən çıxarılması məqsədilə yerini dəyişdirməklə yenidən tikilib-quraşdırılması işləri aparılır.

Yarımstansiya  üçün  yeni  2  ədəd  110/35/10 kV-luq, 16 MVA gücündə transformatorun alınması məqsədilə dövlət satınalma müsabiqəsi həyata keçirilib. Müsabiqənin qalibi “Orbital Engineering” MMC ilə satınalma müqaviləsi imzalanıb. Müqaviləyə uyğun olaraq alınacaq 2 ədəd güc transformatorundan 1 ədədi muxtar respublikaya gətirilib və yarımstansiyada quraşdırılması işləri aparılır.

Yaxın zamanlarda digər güc transformatoru da muxtar respublikaya gətiriləcək. Tikinti-quraşdırılması davam etdiriləcək 36 MVt gücündə “Ordubad” Su Elektrik Stansiyasından 87 MVt gücündə Naxçıvan Modul Elektrik Stansiyasına çəkiləcək iki dövrəli 110 kV-luq hava elektrik verilişi xəttinin bir dövrəsinin yarımstansiyaya birləşdirilməsi də nəzərdə tutulur. Yarımstansiya Culfa şəhərində və rayonun Yaycı, Dizə kəndlərində istehlakçıların keyfiyyətli elektrik enerjisi tələbatını ödəməklə yanaşı, elektrik enerjisinin texniki itkilərini azaltmaqda mühüm rol oynayacaq. Sadalanan bölgələri qidalandıran mövcud 10 kV-luq elektrik xətti yeni yarımstansiyadan qidalandıralacaq 35 kV-luq gərginlik pilləsinə keçiriləcəkdir. Həmçinin, yeni yarımstansiyaya mövcud İran İslam Respublikası ilə 132 kV-luq “Culfa-Culfa” hava elektrik verilişi xətti qoşulacaqdır.