Bu gün Bakı vaxtı ilə saat 22:00-da ABŞ Mərkəzi Bankı (FED) faiz qərarını açıqlayacaq.

Marja.az xəbər verir ki, FED-in bu gün yekunlaşacaq iclasından çıxacaq qərar səbirsizliklə gözlənilir. Çünki FED-in yüksək inflyasiyanı hədəfinə qaytarmaq üçün faizləri artırması, ardınca fasilə verməsi dövrlərindən sonra ilk dəfə faizləri aşağı salacağı gözlənilir. FED-in dörd ildən artıq müddətdə ilk dəfə faiz dərəcələrini aşağı salacağı nəzərdə tutulur.

Bazarlarda proqnozlar fərqlənir. Ehtimal olunur ki, FED faizlərini 0,25 faiz bəndi və ya 0,50 faiz bəndi azalda bilər. Ən çox FED-in faizlərini 0,25 bənd azaldaraq 5,50%-dən 5,25%-ə endirəcəyinə dair proqnozlar üstünlük təşkil edir.

Həmçinin bir sıra iqtisadçı, analitik və investor hesab edir ki, iqtisadiyyatın dayanmasının qarşısını almaq üçün ABŞ Mərkəzi Bankı faiz dərəcələrini daha çox - 0,50 faiz bəndi azaldacaqdır. 

Bazarlar FED-in faizlərində 0,25 və ya 0,50 bəndlik bir azalma olacağı barədə bölünsələr də, mərkəzi bankın çərşənbə günü faiz dərəcələrini mütləq aşağı salacağı gözlənilir.

FED-in bu həftədən etibarən yumşaq pul siyasəti dövrünə başlayacağı gözlənilir və analitiklər ilin sonuna qədər ən azı 1 faiz bəndi (100 bənd) endirim gözləyirlər.

Bakı vaxtı ilə saat 22:30-da FED sədri Cerom Pauelin mətbuat konfransı başlayacaqdır. 

ABŞ-da prezident seçkilərinə iki aydan az bir müddət qalıb. FED belə bir ərəfədə ən yüksək faiz dərəcələrini aşağı salmağa başlayacaqdır. 

ABŞ-da inflyasiya mərkəzi bankın 2% hədəfinə yaxınlaşmışdır. 

FED faizləri aşağı salmaqla iqtisadi artıma dəstək vermək və onunla birlikdə iş yerlərinin artımasını qoruyub saxlamaq istəyir. 

ABŞ-da iş yerlərinin artımı aşağı düşüb, lakin müsbət olaraq qalır. Çərşənbə axşamı açıqlanan pərakəndə satış və sənaye istehsalı məlumatları da gözləntiləri aşıb.

FED-in uçot dərəcəsini 14 ay ərzində cari 5,25-5,50% diapazonunda saxlayıb.