Qlobal bazarlarda son vəziyyət - GÜNƏ BAXIŞ

Qlobal bazarlarda son vəziyyət - GÜNƏ BAXIŞ

Qlobal bazarlarda son vəziyyət - GÜNƏ BAXIŞ

(®) Dünən Avropa Mərkəzi Bankının (AMB) uçot faiz dərəcəsini endirməsi fonunda dollar major valyutalar qarşısında kəskin şəkildə ucuzlaşdı.

Həmçinin, qızılın qiyməti tarixi maksimumu yeniləyib. EUR/USD valyuta cütlüyü ötən gün ərzində 1.1005 həddindən 1.1089 həddinə qədər bahalaşıb. Eyni qaydada, GBP/USD cütlüyündə də müvafiq dövr ərzində qiymət 1.3032 həddindən 1.3150 həddinə qədər kəskin artım sərgiləyib. USD/JPY cütlüyü 140.650 səviyyəsinə qədər ucuzlaşıb.

Ötən gün Avropa Mərkəzi Bankının (AMB) yaydığı bəyanatdə qeyd olunub ki, cümə axşamı günü keçirilən toplantıda tənzimləyici qurum uçot faiz dərəcəsini illik 4.25%-dən 3.65%-ə qədər endirib. Tənzimləyici qurumun qəbul etdiyi qərar analitiklərin proqnozu ilə üst-üstə düşüb. Həmçinin, qeyd olunub ki, faiz dərəcələri depozit xətti üzrə 3.5%, yenidən maliyyələşdirmə əməliyyatları üzrə 3.65%, marjınal kreditləşmə üzrə isə 3.90% təşkil edəcək.

AMB-nin verdiyi qərar və dolların ucuzlaşması fonunda qızılın qiyməti dəstək alaraq dünən 1%-dən çox bahalaşıb və yeni rekord səviyyəyə çatıb. Hal-hazırda dəyərli metal 2568$ həddində ticarət olunur.

İnvestorlar ABŞ Federal Ehtiyatlar Sisteminin gözlənilən monetar siyasətinin yumşaldılması ilə bağlı əlavə ipucu əldə etmək üçün ölkə üzrə dərc olunan statistik məlumatları diqqətlə izləyirlər. Qeyd etmək lazımdır ki, tənzimləyici qurumun uçot dərəcəsini aşağı salması ehtimalları dolları zəiflədir və bununla da qızıl qiymətlərini dəstəkləyir.

Eləcə də, dünən ABŞ-da sentyabrın 7-də sona çatan həftə üzrə İşsizlik Müavinəti üçün Müraciətlərin Sayı açıqlanıb. Göstərici 2 min artaraq 230 min təşkil edib. Həmçinin, avqust ayında İstehsal Qiymətləri İndeksi (PPI) 0.2% təşkil edib.

Bugün Avrozonada dərc olunacaq Sənaye Sektorunda İstehsal Həcmi və ABŞ-da açıqlanacaq İdxal və İxrac İndeksi göstəriciləri investorların diqqət mərkəzində olacaq.

Məlumat İnvest-AZ İnvestisiya Şirkətinin analitikləri tərəfindən hazırlanıb.

13.09.2024 10:54

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az