Dollar/yen məzənnəsi ötən gün səhər keçən ilin sonundan bu yana ən minimum həddinə çatdıqdan sonra, bahalaşmağa başlayıb. USD/JPY cütlüyü dünən 140.710 (28 dekabr tarixindən bəri ən aşağı hədd) səviyyəsini test etdikdən sonra 142.770 səviyyəsinə qədər yüksəlib.

EUR/USD cütlüyü isə əvvəlki gün ərzində 1.1054 həddindən 1.1002 həddinə qədər ucuzlaşsa da, buradan dəstək taparaq bir qədər bahalaşıb və 1.1017 səviyyəsində qərarlaşıb. Dollar indeksi 0.08% artaraq 101.77 bənd təşkil edib.

Bazar iştirakçıları çərşənbə günü dərc edilən məlumatları qiymətləndirməyə davam edir. Belə ki, ABŞ-da İstehlak Qiymətləri İndeksi illik ifadədə iyul ayı ilə müqayisədə avqust ayında 2.9%-dən 2.5%-ə qədər geriləyib. Aylıq ifadədə istehlak qiymətləri avqust ayında 0.2% artıblar. Açıqlanan göstəricilər ABŞ Federal Ehtiyatlar Sisteminin gələn həftə keçiriləcək iclasından sonra mümkün hərəkətliyi müəyyən etmək üçün vacibdir. Verilən məlumatlara əsasən, analitiklərin 87%-i tənzimləyici qurumun uçot dərəcəsinin 25 baza bəndi - 5-5.25%-ə qədər endirilməsini proqnozlaşdırırlar.

Cümə axşamı Avropa Mərkəzi Bankının (AMB) toplantısının nəticələri məlum olacaq. Analitiklər AMB-nin faiz dərəcəsini 4.25%-dən 4%-ə qədər endirəcəyini proqnoz edirlər. Faiz qərarından əlavə, tənzimləyici qurum Avrozona üçün yenilənmiş makroiqtisadi proqnozları da təqdim edəcək.

ABŞ-da istehlak qiymətləri ilə bağlı məlumatların açıqlanmasından sonra beynəlxalq birjalarda qızılın qiyməti bir qədər yüksəlib. Dəyərli metalın 1 troya unsiyası üçün spot qiyməti hal-hazırda 2518$ təşkil edir. Ekspertlərin fikrincə, dolların 2025-ci ildə ucuzlaşmaqda davam edəcəyi təqdirdə, ABŞ-dan kənarda qızılın tələbi və qiymətləri dəstək ala bilər. Ehtimal olunur ki, mərkəzi banklar çox güman ki, qızıl almağa davam edəcəklər. Bundan əlavə, analitiklər 2025-ci ilin sonunda qızılın qiymətinin 1 unsiya üçün 2750$ səviyyəsinə çatacağını proqnoz edirlər.

ABŞ-da baş verən “Francine” qasırğasının təsiri fonunda cümə axşamı səhər birjalarda neftin qiyməti bahalaşır. “Brent” markalı neftin bir barrel üçün qiyməti 72$, “WTI” markalı neftin isə bir barrel üçün qiyməti 68.2$ təşkil edir. Analitiklərin fikrincə, "Francine” qasırğası ilə bağlı narahatlıqlar üstünlük təşkil edir və istənilən istehsalda fasilələr yaxın müddətdə tədarükün kəsilməsinə səbəb olacaq. Bununla belə, son zamanlar qiymətlərin aşağı düşməsi o deməkdir ki, “treyderlər iqtisadi artımın yavaşlayacağına getdikcə daha çox əmin olurlar ki, bu da bütün dünyada yanacağa tələbatın azalmasına səbəb olacaq”.

Məlumat İnvest-Az İnvestisiya Şirkətinin analitikləri tərəfindən hazırlanıb.