Çərşənbə günü səhər Avrozonada ÜDM və Sənaye Sektorunda İstehsal Həcminə dair göstəricilərin dərc olunmasının ərəfəsində dollar major valyutalar qarşısında bir qədər ucuzlaşıb. Ötən gün 1.0926 səviyyəsində ticarət olunan EUR/USD valyuta cütlüyü gün sonunda 1.0999 səviyyəsinə qədər yüksəlib. Həmçinin GBP/USD cütlüyü də dünən 1.2759 səviyyəsindən 1.2872 səviyyəsinə qədər bahalaşıb. Dollar indeksi isə 0.08% artaraq 102.64 bənd təşkil edir.

Dünən açıqlanan məlumatlara əsasən, Böyük Britaniyada işsizlik səviyyəsi aprel-iyun aylarında mart-may ayları ilə müqayisədə 4.4% səviyyəsindən 4.2% səviyyəsinə qədər enib. Analitiklər, əksinə, 4.5%-ə qədər artım proqnozlaşdırmışdılar. Eləcə də, Avropa İqtisadi Araşdırmalar Mərkəzinin (ZEW) hesabatına əsasən, Almaniyada İqtisadi İnkişaf Proqnozu İndeksi avqust ayında 41.8 bənddən 19.2 bəndədək azalıb.

Həmçinin çərşənbə günü Yeni Zelandiya Ehtiyat Bankı faiz qərarını açıqlayıb. Mərkəzi bank uçot faiz dərəcəsini 5.5% səviyyəsindən 5.25% səviyyəsinə qədər endirmək qərarına gəlib.

Bugün Böyük Britaniyanın Milli Statistika İdarəsi (ONS) ölkədə istehlak qiymətlərinin dinamikası haqqında məlumatları dərc edəcək. Ekspertlər iyul ayında illik inflyasiyanın 2%-dən 2.3%-ə qədər sürətləndiyini proqnozlaşdırırlar.

Bakı vaxtı ilə saat 13:00-da Avropa statistika agentliyi “Eurostat” ikinci rübdə Avrozonanın ÜDM dinamikasının yekun qiymətləndirməsini dərc edəcək. Ekspertlər ÜDM-in illik ifadədə 0.6%, rüblük ifadədə isə 0.3% artdığını ehtimal edirlər.

Eyni zamanda, “Eurostat” tərəfindən dərc ediləcək Avrozona ölkələrində Sənaye Sektorunda İstehsal Həcminə dair statistik məlumatlar investorların diqqət mərkəzində olacaq hadisələrdən biridir. Belə ki, analitiklərin proqnozlarına əsasən, iyun ayında birliyə daxil olan ölkələrdə ümumi sənaye istehsalının həcmi illik ifadədə 2.9% azalıb. Aylıq ifadədə isə 0.5% artım proqnoz olunur.

Məlumat İnvest-AZ İnvestisiya Şirkətinin analitikləri tərəfindən hazırlanıb.