Noyabrın 5-də ABŞ-da keçirilməsi planlaşdırılan seçkilər qlobal bazarların gündəmdədir. Seçki prosesi ilə bağlı hadisələr və prezidentliyə namizədlərin açıqlamaları bazarlara daha çox təsir etməyə başlayıb.

Marja xəbər verir ki, Prezident Co Baydenin yarışdan çəkilmək qərarından sonra investorlar bu addımın Trampın seçki şanslarına təsirini diqqətlə izləyəcəklər. ABŞ dolları da daxil olmaqla təhlükəsiz sığınacaq aktivi olan qızıl, ABŞ-da yeni siyasi qarışıqlıqlar fonunda daha da bahalaşma potensialına malikdir. Təhlilçilər də Demokrat Partiyasının keçid prosesini problemsiz başa vurması şansının olduğunu da düşünürlər.

Digər tərəfdən Trampın ABŞ-da keçiriləcək prezident seçkilərində yenidən seçilmə ehtimalının artması qlobal bazarlarda "ticarət müharibələrinin" yenidən başlayacağı ilə bağlı narahatlıqlara səbəb olub.

2018-ci ildə prezident olarkən Çindən idxal edilən 200 milyard dollarlıq məhsula rüsum tətbiq edən Tramp, ikinci dəfə vəzifəyə başlayacağı təqdirdə Çindən gələn mallara 60 faiz, digər ölkələrdən idxal edilən mallara isə 10 faiz gömrük rüsumu tətbiq etməyi planlaşdırır. 

Tramp Ağ Evə qayıdarsa, Çinlə yanaşı, Avropa İttifaqı (Aİ) ilə də ticarət gərginliyinin artması riski var. Tramp 200 milyard dollardan çox ticarət kəsiri olduğuna işarə edərək, Avropa ittifaqının ABŞ avtomobilləri və kənd təsərrüfatı məhsullarını almamasından şikayətlənir. Alüminium, polad tarifləri və Rəqəmsal Xidmətlər Vergisi Trampın vəzifəyə gəldiyi təqdirdə Avropa ilə yenidən alovlana biləcək ticarət mübahisələri kimi önə çıxır.

Eyni zamanda Donald Tramp ABŞ dollarının ucuzlaşdırılmasının tərəfdarıdır. O hesab edir ki, bahalı dollar ABŞ ixracatçılarına zərər vurur. 

İqtisadçılar Tramp administrasiyasının iqtisadiyyata təsirindən narahatdırlar

İyun ayında dərc edilən bəyanatda Nobel mükafatı almış 16 iqtisadçı “ikinci Tramp administrasiyasının ABŞ iqtisadiyyatı üçün risklərindən dərin narahat olduqlarını” bildiriblər.

Cozef Stiqlitsin rəhbərliyi ilə hazırlanan bəyanatda “Tramp, onun hərəkətləri və siyasəti ABŞ-ın dünyada sabitliyini və mövqeyini təhdid edir” qeyd edilib. Bəyanatda deyilir ki, “Trampın maliyyə cəhətdən məsuliyyətsiz büdcələri ilə inflyasiyanı yenidən alovlandıracağına dair haqlı narahatlıq var”.

Bəzi istiqraz investorları da Trampın ikinci dövründə həyata keçirəcəyi siyasətlərin yüksək inflyasiyaya səbəb olacağından və maliyyə kəsirlərini artıracağından narahat olduqlarını bildiriblər.

Eyni zamaanda, seçki gününə qədər çox şeyin dəyişə biləcəyi də qeyd olunur.