Qlobal fond bazarları ABŞ-ın qeyri-kənd təsərrüfatı məşğulluq və əmək haqqı məlumatlarından əvvəl rekord səviyyələrə yüksəlib. MSCI World Index ABŞ-dan bir sıra məlumatların dəstəyi ilə rekord qırıb.

Marja xəbər verir ki, Asiyada Yaponiyanın Topix indeksi də gün içi rekord səviyyəyə çatıb. Koreya səhmləri isə Samsung-un balans hesabatı ilə bahalaşıb. ABŞ fond fyuçersləri səhər saatlarında bir qədər yüksəkdir. İstiqrazlar kənd təsərrüfatı sektoru xaric məşğulluq məlumatları ərəfəsində sakit qalır. ABŞ-ın 10 illik istiqrazlarının faizi 4,359 faizdir.

Bloomberg Dollar İndeksi sterlinqin möhkəmlənməsi səbəbindən 0,1 faiz geriləyib.

Bu gün Bakı vaxtı ilə saat 16:30-da açıqlanacaq ABŞ-da məşğulluq məlumatlarının qeyri-kənd təsərrüfatı sahəsində məşğulluğun yavaşlamasını və əmək haqqı artımlarının soyumasını əks etdirəcəyi gözlənilir.

Bloomberg-in sorğusunda əks olunan gözləntilərə görə, ABŞ iqtisadiyyatı iyun ayında 191 min xalis kənd təsərrüfatı xaricində iş yeri yaradıb. Bu məlumat may ayında 272 min idi.

Orta saatlıq əmək haqqının illik 3,9% artacağı gözlənilir ki, bu da son üç ilin ən aşağı artım səviyyəsidir (Mayda illik 4,1% artmışdı). İşsizlik səviyyəsinin də 4 faiz səviyyəsində qalacağı gözlənilir ki, bu da son iki ildən artıq müddətdə ən yüksək səviyyədir. Əgər gözləntilər özünü doğrultsa, əmək bazarındakı bu tədricən soyuma FED-in bu il iki faiz endirimi etməsi ssenarisini gücləndirə bilər.

Orta saatlıq əmək haqqının aylıq 0,3% artacağı proqnozlaşdırılır. Mayda aylıq müqayisədə artım 0,4% təşkil etmişdi. 

İnvestorlar sentyabr və dekabr aylarında olmaqla bu il FED-dən iki faiz endirimi gözləyirlər.

Bloomberg Economics-in iqtisadçıları, "Məşğulluqla bağlı məlumatlar FED-in səbirli olması lazım olduğunu göstərsə də, işsizlik nisbətindəki artım FED-i tələsdirə biləcəyindən xəbər verir. Biz inanırıq ki, FED sentyabr iclasında faiz dərəcələrini azaltmağa başlamaq üçün daha çox sübut əldə edəcək", - deyib.