İsraildə kabinet dəyişikliyinin, İran prezidenti İbrahim Rəisinin helikopter qəzasında ölməsinin və Səudiyyə Ərəbistanı kralının səhhətinin pisləşməsinin Yaxın Şərqdə geosiyasi risklərin artması ilə nəticələnə biləcək yeni qeyri-müəyyənlikləri ortaya çıxaracağı gözlənilir.

Marja.az xəbər verir ki, İsrail müxalifətinin lideri olan, lakin Qəzzada əməliyyatlar üçün yaradılan Müharibə qərargahında vəzifə yerinə yetirən Benny Gantz, iyunun 8-dək Qəzza ilə bağlı yeni planın irəli sürülməyəcəyi təqdirdə istefa verəcəyini açıqlayıb. Gantz-ın istefası Müharibə qərargahının dağılması ilə nəticələnəcəyi gözlənilməsə də, bunun İsrailin baş naziri Benyamin Netanyahuya təzyiqləri artıracağı gözlənilir. Netanyahu sonuncu dəfə bazar ertəsi ABŞ Milli Təhlükəsizlik Şurasının sədri Jake Sullivan ilə görüşüb.

Digər tərəfdən Səudiyyə Ərəbistanının vəliəhd şahzadəsi Məhəmməd Bin Salman Kral Salmanın səhhətinin pisləşməsi səbəbindən Yaponiyaya səfərini ləğv edib. Səudiyyə Ərəbistanının 88 yaşlı kralı Salman Bin Əbdüləziz ağciyər iltihabı səbəbindən xəstəxanaya yerləşdirilib.

Rəisi dünyasını dəyişdi

İran prezidenti İbrahim Rəisi və xarici işlər naziri Hüseyn Əmir Abdullahianın da olduğu İran rəsmilərini daşıyan helikopterin qalıqları tapılıb, Rəisi və Abdullahianın həyatını itirdiyi təsdiqlənib.

Saatlarla davam edən axtarışlardan sonra İran dövlət televiziyası bu səhər dağıntıların ətrafında həyat əlamətinin olmadığını bildirib. Bölgədəki güclü duman səbəbindən axtarış-xilasetmə işləri ləng gedirdi.

İranın ruhani lideri Ayətullah Əli Xamenei qəzadan sonra verdiyi açıqlamada ölkənin fəaliyyətində heç bir ləngimə olmayacağını bildirib.

İran prezidenti İbrahim Rəisi Azərbaycan prezidenti İlham Əliyevlə iki ölkə sərhədində bəndin açılışını edib. Daha sonra qayıdış yolunda Rəisinin helikopteri İranın Şərqi Azərbaycan əyalətində çətin relyefli ərazidə qəzaya uğrayıb.

Əmtəələr bahalaşıb 

Qızıl ABŞ Mərkəzi Bankının (FED) bu il faizləri aşağı salmağa başlayacağı proqnozları və Rəisinin helikopter qəzasının yaratdığı geosiyasi risklə bütün zamanların ən yüksək səviyyəsinə yüksəldib. Asiya əməliyyatlarında qızılın bir unsiyası 1,1 faizədək bahalaşaraq 2442 dollar olmaqla yeni rekorda çatıb.

Analitiklər bildirirlər ki, İrandan gələn xəbər axınına görə, investorlar mövqelərini azaltmaq (satış etmək) istəmirlər.

Digər tərəfdən, məhdud təklif gözləntisi ilə son aylarda yüksələn mis qiymətləri yeni pik həddinə çatıb. LME fyuçers bazarında mis 4,1 faizədək bahalaşaraq 11 104,5 dollard olmaqla rekord qırıb.

Brent neftin qiyməti 0,5% artaraq 84,36 dollara yüksəlib.