Qaz İxrac Edən Ölkələr Forumunun (GECF) 2024-cü il üzrə illik təbii qaz hesabatından tərtib etdiyi məlumatlara əsasən, keçən il ümumilikdə 5 milyard barel neft ekvivalentində neft və qaz aşkar edilib. Bu kəşflərin 40 faizi təbii qaz (340 milyard kubmetr), 60 faizi isə neft olub.

Marja.az xəbər verir ki, 2022-ci ildə kəşf edilən 10,5 milyard barel neft ekvivalenti ilə müqayisədə qlobal neft və qaz kəşflərinin 52,3 faiz azalması rekord azalma kimi qeydə alınıb.

GECF-in məlumatına görə, ötən il kəşfiyyat işlərinin həcminin azalması təbii qaz və neft üçün kəşfiyyat xərclərinin əhəmiyyətli dərəcədə artmasına səbəb olub.

2022-ci ildə təbii qazın kəşfiyyatının xərci neft ekvivalentinin barreli üçün 2,6 dollar olduğu halda, ötən il bu xərc 5,3 dollara yüksəlib. 2022-ci ildə 3,5 dollar olan neftin kəşfiyyatı xərci ötən il 8,8 dollara yüksəlib.

“Kəşf edilən həcmlərin azalması, kəşfiyyat investisiyalarının 2023-cü ildə 60 milyard dollara çatdırılmasına baxmayaraq, bəzi əsas dəniz kəşfiyyat quyularının məyusedici nəticələri ilə bağlı olub”, - hesabatda deyilir.  

Keçən il ümumi kəşflərin 74 faizi dəniz kəşfləri olub. 2022-ci ildə isə bu, 87 faiz olaraq qeydə alınmışdı.

GECF-in məlumatına görə, bu, kəşfiyyat üçün daha böyük xərclərlə nəticələnib və qlobal kəşfiyyat fəaliyyətlərində əlavə çətinlikləri göstərir.

Asiya-Sakit Okean, İndoneziya və Malayziya sahillərində aparılan kəşfiyyat işləri 2023-cü ildə aşkar edilmiş neft və qaz həcmlərinin ən yüksək hissəsini (32 faiz) təşkil etmişdir. Kəşf edilmiş həcmlərin 21 faiz Latın Amerikasının, 11 faizi Avropa və Afrikanın, 10 faiz Yaxın Şərqin payına düşüb.

Ölkələr üzrə, İndoneziya yaxınlığındakı Larayan və Geng North yataqlarında qaz kəşfləri 2023-cü ildə ən mühüm təbii qaz kəşfləri olub. Ardınca Malayziya yaxınlığındakı Sarawak yatağında böyük qaz kəşfləri olub.

Neft baxımından ən mühüm kəşflər Qayana sahillərindəki Lancetfish və Fangtooth yataqlarında yeni neft kəşfləri və Türkiyənin Şehit Aybüke Yalçın quyusunda kəşf olub.