Bugün Yaponiya Mərkəzi Bankı aprel toplantısının nəticələrinə əsasən, uçot faiz dərəcəsini 0-0.1% səviyyəsində saxladı. Qeyd etmək lazımdır ki, tənzimləyici qurum mart ayında 17 il ərzində il dəfə olaraq uçot dərəcəsini artırmışdı. Xatırladaq ki, sonuncu dəfə 2007-ci ilin fevral ayında Yaponiya Mərkəzi Bankı uçot dərəcəsini 0.5%-ə qaldırmışdı, sonra isə 2008-ci ilin oktyab ayından başlayaraq faiz dərəcələrini endirməyə başlamışdı. 2016-cı ilin yanvar ayında isə tənzimləyici qurum -0.1% səviyyəsində mənfi uçot faiz dərəcəsi tətbiq etmişdi. 

Yaponiya dövlət istiqrazlarına, dövriyyədə olan kommersiya xarakterli qiymətli kağızlara (CP) və korporativ istiqrazlara gəldikdə, tənzimləyici qurum mart qərarına uyğun olaraq geri alma siyasətini davam etdirəcək. Mərkəzi Bank təxminən bir ildən sonra onların alınmasını dayandıracaq. Həmçinin mərkəzi bank ölkənin ÜDM artımı proqnozunu 1.2%-dən 0.8%-ə qədər endirib. 

Yaponiya Mərkəzi Bankının faiz qərarı fonunda USDJPY tarixi maksimum həddi yeniləyərək,  156.200 səviyyəsinə qədər bahalaşdı. Hal-hazırda valyuta cütlüyü 156.150 səviyyəsində ticarət olunur. EUR/USD və GBP/USD valyuta cütlükləri isə müvafiq olaraq 1.0724 və 1.2505 səviyyələrində qərarlaşıblar. Dollar indeksi 105.64 bənd təşkil edir.

Bazar iştirakçıları bugün ABŞ-ın Ticarət Nazirliyinin İqtisadi Təhlil Bürosu tərəfindən Bakı vaxtı ilə saat 16:30-da dərc olunacaq mart ayı üzrə ölkə əhalisinin gəlirləri və xərcləri haqqında məlumatları diqqətlə izləyəcəklər. Ekspertlər fevral ayı ilə müqayisədə gəlirlərin 0.5%, xərclərin isə 0.6% artığını proqnozlaşdırırlar.

ABŞ-da ÜDM üzrə məlumatlar dərc olunduqdan sonra, cümə günü səhər beynəlxalq birjalarda neft qiymətləri bahalaşır. ”Brent” markalı neft 87.40$ səviyyəsindən 89.20$ səviyyəsinə qədər artım göstərdi. “WTI” markalı neft isə 84.5$ səviyyəsinə qədər yüksəlib. Cari həftənin sonunda “Brent” markalı neft təqribi olaraq 2.4%, “WTI” markalı neft isə 1% bahalaşıb.

Məlumat İnvest-AZ İnvestisiya şirkətinin analitikləri tərəfindən hazırlanıb.