12 mart 2024-cü il tarixində Bakı Fond Birjasının (BFB) Listinq Komitəsinin qərarı ilə  Bank “BTB” ASC-nin 5 milyon manatlıq səhmləri Bakı Fond Birjasında standart bazar seqmentində listinqə daxil edilib.

Birjanın yaydığı məlumatda bildirilir ki, qeyd olunan səhmlərin yerləşdirilməsi Bakı Fond Birjasında abunə yazılışı üsulu ilə həyata keçiriləcəkdir. 13 mart 2024-cü il tarixində Bank “BTB” ASC-nin səhmləri üzrə abunə yazılışına baş tutacaqdır. Səhmlər üzrə yerləşdirmə 14-19 mart tarixləri aralığında keçiriləcəkdir. 

Yerləşdirmə üzrə anderrayter “Assist Finance İ.Ş” ASC-dir. 

Adi, adlı , sənədsiz səhmlərin sayı 5000 ədəd, hər birinin nominal dəyəri 1000 mantdır.

Xəbər verdiyimiz kimi, Bank “BTB” ASC-nin nizamnamə kapitalı 5 milyon manat artırılır. Bank hər birinin nominal dəyəri 1000 manat olan 5000 ədəd adi, adlı, sənədsiz səhmlər emissiya edib. Təklifin səbəbi Bankın gələcək inkişafı və artım planlarının icrası çərçivəsində Azərbaycan Respublikası Mərkəzi Bankının müəyyən etdiyi minimum kapital tələblərinə cavab verməsi və dayanıqlı kapital mövqeyinin təmin olunmasıdır. Emissiya nəticəsində cəlb olunucaq vəsait Bankın fəaliyyətinin mühüm növlərindən biri olan kreditləşmədə istifadə olunacaq. Emissiyanın həyata keçirilməsi nəticəsində cəlb olunacaq vəsaitin xalis məbləği 4 milyon 994 min 300 manat gözlənilir.

31 dekabr 2023-cü il tarixində Bank “BTB” ASC-nin nizamnamə kapitalı 66 milyon 450 min manat təşkil edib. Lakin yığılmış 19 milyon 87 min manat zərər ilə əlaqədar olaraq cəmi kapital 47 milyon 363 min manat təşkil edib. Bankın nizamnamə kapitalı hər birinin nominal dəyəri 1000  manat olan 66 450 ədəd adi, sənədsiz, adlı səhmdən ibarətdir.

Yerləşdirmə uğurla yekunlaşarsa Bankın nizamnamə kapital 71 milyon 450 min manata yüksələcəkdir.

Hazırda Bank “BTB” ASC-nin səhmdarları Mehdiyeva Nigar İsmayıl qızı (74.9872% ), Sadiq Rza İsmayıl oğlu (19.0128%) və Mahmudova Tükazban Ağa qızıdır (6%).