Dünən ABŞ Federal Ehtiyatlar Sisteminin sədri Cerom Pavel öz çıxışında tənzimləyici qurumun faiz dərəcələrini azaltmağa başlamaqdan uzaq olmadığını bildirib. Həmçinin, o, qeyd edib ki, FED inflyasiyanın 2%-ə qədər davamlı azalmasına daha əmin olacağı vaxtı gözləyir. Yalnız bundan sonra məhdudiyyətlərin səviyyəsini azaltmağa başlamaq məqsədəuyğun olacaq.

Pavel əlavə edib ki, FED monetar siyasətini yumşaltmağa hələ hazır deyil. Daha əvvəl o bildirmişdi ki, iqtisadi artım davam edərsə və inflyasiya azalarsa, FED ehtiyatlı şəkildə monetar siyasətini yumşaltmağa başlayacaq.

Bundan əvvəl, Federal Ehtiyatlar Sistemi son toplantısının nəticələri ilə bağlı hesabat dərc etmişdi. Ondan sonra tənzimləyici qurumun rəhbərliyinin bir sıra üzvləri həddindən artıq uzun müddət ərzində məhdudlaşdırıcı tədbirlər nəticəsində iqtisadiyyatda tənəzzül risklərinin formalaşa biləcəyi ilə bağlı fikirlər bildirmişdilər. Eyni zamanda, FED-in toplantısının iştirakçıları faiz dərəcəsində gələcək dəyişikliklərin daxil olan iqtisadi məlumatlardan, perspektivlərdən və risk balansından asılı olacağını qeyd ediblər.

Qeyd etmək lazımdır ki, yanvar ayında FED faiz dərəcəsini ardıcıl dördüncü dəfə illik 5.25-5.5% səviyyəsində saxladı.

FED-in toplantısının nəticələri fonunda dollar major valyutalar qarşısında ucuzlaşmağa davam etdi. Hal-hazırda EURUSD, GBPUSD və USDJPY valyuta cütlükləri müvafiq olaraq 1.0946, 1.2808 və 147.832 səviyyələrində ticarət olunurlar. Dollar indeksi (ABŞ-ın ticarət tərəfdaşı olan altı ölkənin valyuta səbətinə nisbətdə məzənnə) 102.79 bənd təşkil edir.

Bugün ABŞ-da Bakı vaxtı ilə saat 17:30-da Qeyri-kənd Təsərrüfatı Sektorunda Yeni Yaranan İş Yerlərinin Sayı (Nonfarm Payrolls) və İşsizlik Səviyyəsi göstəriciləri dərc olunacaq. Analitiklərin proqnozlarına əsasən, ölkədə fevral ayında işsizlik səviyyəsi yanvar ayında olduğu kimi, 3.7% səviyyəsində qalıb. Həmçinin onlar ölkə iqtisadiyyatının Qeyri-kənd Təsərrüfatı Sektorunda Yeni Yaranan İş Yerlərinin Sayının fevral ayında 200 min olduğunu ehtimal edirlər.

Eləcə də, bugün Almaniyada, Avrozonada və Kanadada dərc olunacaq statistik məlumatlar investorların diqqət mərkəzində olacaq hadisələrdir.

Məlumat Invest-AZ Investisiya Şirkətinin analitikləri tərəfindən hazırlanıb.