Azərbaycan Mərkəzi Bankının (AMB) İdarə Heyəti “Ödəniş sistemi operatorunun fəaliyyətinin təşkili və həyata keçirilməsi Qaydası”nı təsdiqləyib.

Bununla bağlı AMB-nin sədri Taleh Kazımov yeni qərar imzalayıb.

Qərara əsasən, ödəniş sistemi operatorunun fəaliyyətinin ilk 3 ili üçün hazırlanmış biznes-planı, eləcə də ödəniş sisteminin etibarlı və təhlükəsiz idarə olunmasını təmin etmək üçün müvafiq təşkilati strukturu və fəaliyyətinin bütün sahələrini əhatə edən daxili nəzarət sistemi olmalıdır.

Operator daxili nəzarət sistemi çərçivəsində ödəniş sisteminin fəaliyyətini davamlı monitorinq etməli və müəyyən edilmiş hədəflərə nail olunmasını qiymətləndirməlidir.

Operator özünün, habelə iştirakçılarının məruz qala biləcəyi risklərin müəyyən edilməsini, qiymətləndirilməsini, monitorinqini və nəzarətini təmin edən risklərin effektiv idarə edilməsi sisteminə malik olmalıdır.

Risklərin idarə edilməsi üzrə daxili qayda və prosedurlar ildə azı 1 dəfə nəzərdən keçirilməlidir. Risklərin idarə edilməsi sistemi operatorun qarşılaşdığı risklərin qarşısını ala bilmədikdə və ya operatorun risk profilində əks olunmayan risklə əlaqədar insident və ya operatorun fəaliyyətində dayanmalar baş verdikdə, həmçinin informasiya sistemləri və texnologiyalarında əsaslı dəyişikliklər aparıldıqda 3 aydan gec olmayaraq risklərin idarə edilməsi sisteminə zəruri dəyişikliklər edilməli, bu dəyişikliklər sənədləşdirilməlidir. Ödəniş sisteminin qarşılaşa biləcəyi risk növlərindən asılı olaraq hər 6 aydan bir stress-testlərin keçirilməsi təmin edilməlidir.

Operator fəaliyyəti ilə bağlı rüblük hesabatı növbəti rübün ilk 5 iş günündən gec olmayaraq, eləcə də hər ilin yanvar ayının son iş gününədək ötən təqvim ili ərzində baş vermiş dəyişikliklər göstərilməklə istifadə olunan əsas avadanlıq və proqram təminatlarının siyahısını, onlar arasında əlaqə üzrə topoloji diaqramı Mərkəzi Banka təqdim etməlidir

Ödəniş sisteminə yeni iştirakçılar daxil olduqda və ya mövcud iştirakçı ödəniş sistemindən çıxdıqda, habelə iştirakçının statusu dəyişdikdə operator 5 iş günü müddətində hesabatı və operator yeni məsul şəxs barədə qeyd olunan yazılı məlumatı 3 iş günü ərzində Mərkəzi Banka təqdim etməlidir.

Bundan başqa, operatorun fəaliyyətində baş vermiş plansız dayanmalar barədə əlaqələndirici şəxs tərəfindən yazılı məlumat hadisənin baş verməsindən sonra 15 dəqiqədən gec olmayaraq, planlı dayanma halı barədə məlumat isə azı 3 iş günü əvvəl Mərkəzi Banka təqdim edilməlidir.

AMB-nin Hüquq departamentinə bu Qərarın 3 gün müddətində Hüquqi Aktların Dövlət Reyestrinə daxil edilməsi üçün Ədliyyə Nazirliyinə təqdim edilməsi tapşırılıb.

“Report”