Daşınmaz əmlaka görə ödənilmiş ƏDV-nin geri alınması ilə bağlı 6211 müraciətə imtina cavabı verilib

Daşınmaz əmlaka görə ödənilmiş ƏDV-nin geri alınması ilə bağlı 6211 müraciətə imtina cavabı verilib

7457 müraciət üzrə 28,6 milyon manat ƏDV geri qaytarılıb.

Daşınmaz əmlaka görə ödənilmiş ƏDV-nin geri alınması ilə bağlı 6211 müraciətə imtina cavabı verilib

İqtisadiyyat Nazirliyi yanında Dövlət Vergi Xidməti tərəfindən nağdsız qaydada alınmış yaşayış və qeyri-yaşayış sahələrinə görə ödənilmiş ƏDV-nin bir hissəsinin qaytarılması ilə bağlı layihə uğurla davam etməkdədir.

Nazirliyin yaydığı məlumatda bildirilir ki, vətəndaşlar tərəfindən hazırkı tarixə qədər portal üzərindən ümumilikdə 14 mindən artıq müraciət daxil olub. Bu müraciətlərdən 7457-si üzrə 28,6 milyon manat vəsaitin vətəndaşlara ödənilməsi təmin edilib, 6211 müraciətə Qaydaların tələblərinə uyğun olaraq imtina edilib.

Eyni zamanda portal istifadəyə verildiyi tarixdən bu yana bina tikintisi fəaliyyəti ilə məşğul olan şəxslər tərəfindən 1160 sayda “Yaşayış və qeyri-yaşayış sahələrinin təqdim edilməsi ilə bağlı hər bina üzrə məlumat forması” təqdim edilib ki, bunlardan 749-u təsdiqlənib, 401-nə imtina verilib.

Məlumat üçün qeyd edilməlidir ki, 13 sentyabr 2023-cü il tarixindən etibarən geri qaytarılan vəsaitlərin şəxsin müvəkkil bankda olan virtual “ƏDVgerial” hesabına köçürülməsi təmin edilir. Bu addım, öz növbəsində, əvvəllər bu sahədə mövcud olan bir sıra çətinlikləri aradan qaldırıb.

Dövlət Vergi Xidməti tərəfindən vətəndaşların müraciətlərinin araşdırılması zamanı imtinaya səbəb olan bir sıra hallar müşahidə olunur. Bunlar əsasən son ödəniş tarixindən 90 gün ərzində müraciət olunmaması, ödənişin təyinatında e-qaimənin məlumatlarının əks olunmaması, ödənişlərin başqa şəxslər tərəfindən həyata keçirilməsi və ödəniş zamanı ƏDV və əsas məbləğlərin ayrılıqda ödənilməməsi ilə bağlıdır.

Dövlət Vergi Xidməti həmçinin mənzil tikintisi ilə məşğul olan şəxslərə bina tikintisi ilə bağlı məlumat formalarını qanunvericilikdə nəzərdə tutulmuş qaydada təqdim etmələrini tövsiyə edir. Bununla bağlı vergi orqanları tərəfindən müvafiq monitorinq-təhlil işləri aparılır.

23.02.2024 16:27

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az