Bu il ilk dəfə olaraq Cəlilabad rayonunda ixracda rəqabətədavamlı yüksəkkeyfiyyətli məhsul istehsalı üçün çiyələk bağında tam avtomatlaşdırlımış sistem vasitəsilə məhsul yetişdirilib. Ənənəvi sahələrdən fərqli olaraq burada çiyələk torpaqda deyil, hidropon üsulu ilə xüsusi qablarda becərilir.

Bağda rəqabətədavamlı məhsul yetişdirmək üçün yeni texnologiyalardan istifadə edilir. Burada istehsal olunan çiyələyin ixracı da gözlənilir.

“Dünya bazarlarına daha keyfiyyətli və orqanik məhsul çıxarmaq üçün bu il ilk dəfə təsərrüfatımıza Şri-Lankadan gətirilmiş xüsusi qablarda çiyələk yetişdirilməsinə başladıq. Bu üsulla məhsulu həm keyfiyyətli, həm də təmiz və toz–torpaqsız əldə etmək mümkün oldu. Həmçinin məhsulun tez yetişib satışa çıxarılması üçün də bu üsul xüsusi əhəmiyyətə malikdir. Burada suvarma, istiliyin nizamlanması kompüterləşdirilmiş sistem vasitəsilə həyata keçirilir. Buna torpaqsız əkinçilik deyilir. Nəticədən çox razıyıq. Torpaqdakı əkindən fərqli olaraq burada dəniz yosunlarından və gübrələrdən istifadə edilir” , - deyə təsərrüfatın aqronomu İlkin Şəfəqqətov bildirir.

İstixana şəraitində yetişdirilən bu çiyələklərdən il boyu məhsul əldə olunur. Məhsuldarlıq isə digər becərmə üsulları ilə müqayisədə iki dəfə çoxdur. Bu da yerli bazarlarda məhsul bolluğu yaratmaqla yanaşı, onun ixrac potensialını da xeyli artırır.

Aqronomun sözlərinə görə, yığılan məhsul soyuducu anbarlarda saxlanılır, daxili və xarici bazarlara çıxarılır. Bu il əkin zamanı əsasən “Murano” növünə üstünlük verilib. Bunun da əsas səbəbi bu sort çiyələyin daha şirin olması və uzaq məsafələrə daşınmasının daha asan başa gəlməsidir. Digər əsas məsələ ixrac olunacaq məhsulun müəyyən keyfiyyət və qablaşdırma standartlarına cavab verməsidir.

Qeyd edək ki, hidropon üsulu torpaqsız və ya suda becərmə, torpaq olmadan qidalı su ilə bitkinin becərilməsidir. Əkin substratı kimi qum, torf, perlit, qaya yunu və ya gildən istifadə olunur. Son illər ölkəmizdə becərmədə hidropon üsuluna maraq artıb. Bu becərmə üsulu ilə yaradılmış istixanaların sayı artmaqdadır.

© Azərtac