Regionda dəyişən təhlükəsizlik və enerji mühiti səbəbindən Azərbaycan təbii qazını nəql edən Yunanıstan-Bolqarıstan İnterkonnektorunun (IGB) bazarın artan ehtiyaclarına uyğun olaraq genişləndirilməsi imkanlarını fəal şəkildə araşdırılır.

Bunu açıqlamasında layihə operatoru olan ICGB-nin icraçı direktoru Teodora Georgieva deyib.

“IGB-nin hazırda illik ötürmə qabiliyyəti 3 milyard kubmetr təşkil edir. Hazırda PRISMA və RBP platformalarında mövcud tutum hərraca çıxarılıb.

İnterkonnektor Bolqarıstanın daxili istehlakının təqribən yarısını təmin edir, Moldova və Ukrayna kimi regionun digər ölkələrinə yeni mənbələrdən çatdırılma imkanı yaradır”, - deyə o bildirib.

T.Georgieva qeyd edib ki, ICGB artan tələbatı qarşılamaq məqsədilə borunun tutumunun 5 milyard kubmetrə qədər artırılmasında bazar marağını araşdırmaq üçün prosesə başlayıb və artıq Transmissiya Xidmətləri Operatorları (TSO) bu prosesin qeyri-məcburi mərhələsini həyata keçirib: “Bu mərhələdə tələbata dair müsbət impluslar müşahidə edən ICGB prosesin növbəti addımları üzərində işini davam etdirir. Məcburi mərhələ, yəni enerji treyderləri və yükgöndərənlərin qaz tutumlarını sifariş edə biləcəyi mərhələ isə 2024-cü ilin iyul ayına planlaşdırılır. Həmçinin şirkət potensial investisiyaları qiymətləndirmək istiqamətində də fəaliyyət göstərir və bununla bağlı yekun qərarı “BEH Ltd.” ilə “IGI Poseidon” verəcək.

Onun sözlərinə görə, genişləndirmə ilə bağlı qərar verildikdən sonra ICGB mühəndislik mərhələsi üçün podratçı, mövcud infrastrukturda hər hansı dəyişiklik üçün məsləhətçilər seçəcək, nəhayət tender proseduruna və tikinti işlərinə davam edəcək.

“Geniş regionda enerji infrastrukturunun təkmilləşdirilməsi ilə bağlı ICGB Qərbi Balkanlar, Cənub-Şərqi və Mərkəzi Avropadakı digər TSO-lar və ölkələrlə daha sıx əməkdaşlığın fəal tərəfdarıdır. Enerji asılılığını azaltmaq, təhlükəsiz çatdırılma marşrutlarını və şaxələndirilmiş mənbələri təmin etmək məqsədilə Moldova və Ukraynadakı TSO-ların da daxil olduğu Şaquli Qaz Dəhlizi təşəbbüsünün genişləndirilməsini dəstəkləyirik”, - deyə ICGB-nin icraçı direktoru diqqətə çatdırıb.

Qeyd edək ki, 2022-ci ilin oktyabrın 1-dən fəaliyyətə başlayan IGB layihəsi 2011-ci ildə Bolqarıstanda qeydiyyatdan keçmiş “ICGB AD” investisiya şirkəti tərəfindən Bolqarıstanın Enerji Holdinqi (50 %) və Yunanıstanın “IGI Poseidon” (50 %) şirkətinin səhmdarları ilə birlikdə reallaşdırılır.

Ümumi uzunluğu 182 km, illik ötürmə qabiliyyəti 3-5 milyard kubmetr həcmində olan IGB-nin 150 km-lik hissəsi Bolqarıstan ərazisinə düşür.

2023-cü ildə Bolqarıstana 1,39 milyard kubmetr, Yunanıstana 0,67 milyard kubmetr Azərbaycan təbii qazı nəql olunub.

© “Report”