Türkiyə Cümhuriyyəti Mərkəzi Bankı (TCMB) 2023-cü il üzrə sonuncu faiz qərarını açıqladı.

Marja.az xəbər verir ki, TCMB faizini 2,50 bənd də artıraraq 40%-dən 42,5%-ə yüksəldib.

Bazarlar da faizin 2,50 bənd artırılacağını gözləyirdi.

TCMB-nin press-relizində bildirilir:

"Noyabr ayında məhdud artım qeydə alınan əsas inflyasiya, son İnflyasiya Hesabatında təqdim edilən proqnoza uyğun olaraq qalır. Daxili tələbin hazırkı səviyyəsi, xidmət qiymətlərindəki artım və geosiyasi risklər inflyasiya təzyiqlərini canlı saxlayır. Digər tərəfdən, göstəricilər monetar sərtləşdirmənin maliyyə şərtlərində əks olunduğu üçün daxili tələbin tarazlığının davam etdiyini göstərir. İdarə Heyəti inflyasiya gözləntilərində və qiymət davranışında məhdud bir yaxşılaşmanın başladığını qiymətləndirir. Xarici maliyyələşmə şərtlərinin əhəmiyyətli dərəcədə yaxşılaşması, ehtiyatların davamlı artması, türk lirəsi aktivlərinə daxili və xarici tələbin güclənməsi məzənnə sabitliyinə və pul siyasətinin effektivliyinə güclü töhfə verir. Bu kontekstdə aylıq inflyasiyanın əsas tendensiyası üzrə azalma davam edir.

İdarə Heyəti deinflyasiyanın təmin edilməsi üçün tələb olunan monetar sərtlik səviyyəsinə əhəmiyyətli dərəcədə yaxınlaşdığını nəzərə alaraq, monetar sərtləşdirmə tempini yavaşladıb. İdarə Heyəti faizin artırılmasının ən qısa zamanda başa çatdırılmasını nəzərdə tutur. Qiymət sabitliyinin daimi bərqərar olması üçün sərt pul siyasəti zərurət olduğu müddətcə qorunub saxlanılacaq.

İdarə Heyəti, sərt pul siyasətinin məcmu və gecikmiş təsirlərini nəzərə alaraq, inflyasiyanın əsas tendensiyasını azaldacaq və orta müddətli dövrdə 5 faiz hədəfinə çatacaq pul və maliyyə şərtlərini təmin edəcək şəkildə siyasət qərarlarını müəyyən etməyə davam edəcək.

İnflyasiya və onun əsas tendensiyası ilə bağlı göstəricilər yaxından izləniləcək və İdarə Heyəti qiymət sabitliyinin əsas məqsədinə uyğun olaraq sərəncamında olan bütün alətlərdən qətiyyətlə istifadə etməyə davam edəcək.

İdarə Heyəti öz qərarlarını proqnozlaşdırıla bilən, məlumatlara əsaslanan və şəffaf çərçivədə qəbul etməyə davam edəcək".