13.12.2023-cü il tarixində Gəncə şəhərində Bitki Mühafizə və Texniki Bitkilər Elmi-Tədqiqat İnstitutunda (BMTB ETİ) Kənd Təsərrüfatı Nazirliyinin dəstəyi və Azərbaycan Pambıq İstehsalçıları Assosiasiyasının təşkilatçılığı ilə “Better Cotton Initiative (BCI) ölkə üzvlüyünün əldə edilməsi” ilə bağlı ilkin təqdimat prosesi baş tutub.

Ölkəmizdə ilk dəfə keçirilən bu tədbirdə “MKT İstehsalat Kommersiya” MMC şirkəti, özəl laboratoriya nümayəndələri, elm xadimləri, pambıqçılıq sektorunda fəaliyyəti göstərən mütəxəssislər, eyni zamanda Avstraliya, Pakistan, Türkiyədən olan kənd təsərrüfatı üzrə məsləhətçilər iştirak etmişdir.

Təqdimat mərasimində tədbir iştirakçılarına Better Cotton Intitative-in mahiyyəti, fəaliyyət istiqamətləri, pambıq istehsalı məşğul olan biznes subyektləri, elmi-tədqiqat instititutları üçün faydaları barədə məlumat verildi.

"Better Cotton Initiative" (BCI) 2005-ci ildə təsis edilmiş və dünyanın ən böyük qeyri-kommersiya təşkilatıdır. Bu təşəbbüsün məqsədi daha davamlı pambıq əkini üçün qlobal əsaslı standart yaratmaqdır.

Bu missiyaya nail olmaq üçün BCI-nin lisenziyalı yetişdiriciləri (yəni beş qitədə 2 ölkədən 3,23 milyon nəfər) ətraf mühit, sosial və iqtisadi cəhətdən daha davamlı istehsal üsullarını tətbiq etmək üçün təlim keçirlər. Bu isə sudan daha səmərəli istifadə etmək, kimyəvi maddələrdən istifadəni və pestisidlərin mənfi təsirini minimuma endirmək, pambıq əkini ilə məşğul olan fermerlərin həyat şəraitini və iqtisadi inkişafını yaxşılaşdırmaq deməkdir.

BCI-nin pambıq becərilməsi ənənəvi pambığa qarışdırılmadan ayrılıqda aparılır.  Yığım, emal proseslərindən keçən "Better Cotton" adlandırılan pambıq mahlıcı kipləri BCI üzvləri tərəfindən əldə edilir və bazara daxil edilir. Bu kiplər istehsal və təchizat zənciri boyu kütlə (çəki) balansını hesablayan sistem vasitəsilə izlənə bilər.

Better Cotton Initiative bütün dünyada fermerləri, tekstil brendlərini və moda şirkətlərini birləşdirir.

“MKT İstehsalat Kommersiya” MMC Azərbaycan iqtisadiyyatının qeyri-neft sektorunda 25 ildən çox iş təcrübəsinə malikdir. Şirkətin fəaliyyətinin əsas istiqaməti ölkənin 20 pambıqçılıq rayonundan 15-də pambığın yetişdirilməsi, tədarükü və daha sonra pambıqtəmizləmə müəssisələrində emalından ibarətdir. https://www.mktcotton.com/