Rövşən Abdullaoğlunun imza mərasimində izdiham

Rövşən Abdullaoğlunun imza mərasimində izdiham

Rövşən Abdullaoğlunun imza mərasimi 6 saat davam edib. Rövşən Abdullaoğlu “Ən çox oxunan müəllif” nominasiyasının qalibi olub

Rövşən Abdullaoğlunun imza mərasimində izdiham

Müasir ədəbiyyatımızın ən çox oxunan müəlliflərindən olan Rövşən Abdullaoğlunun Azərbaycan Respublikası Mədəniyyət Nazirliyinin 11-15 noyabr tarixlərində təşkil etdiyi IX Bakı Beynəlxalq Kitab Sərgisi çərçivəsində oxucularla görüşü və imza mərasimi keçirilib.

Bakı Ekspo Mərkəzində baş tutan görüşdə bu dəfə də böyük izdiham yaşanıb. Yüzlərlə oxucunun iştirakı ilə keçək müzakirə və sual-cavab saatının ardınca imza mərasimi baş tutub. Günorta saat 2-də başlayan imza mərasimi axşam saat 8-də yekunlaşıb.

Tədbir zamanı Rövşən Abdullaoğlu yeni layihələri, üzərində işlədiyi kitablar, planlaşdırdığı səfərlər haqqında məlumat verib. Daha sonra bir neçə gün əvvəl müjdəsini verdiyi uşaq kitablarını sərgi salonunda oxucularına təqdim edib. Yazıçı Afrika səfərlərinin bəhrəsi olan və 6 kitabdan ibarət “Ləpirçinin macəraları” silsiləsindən hələlik ilk 2 kitabın – “Xilaskar” və “İlk səfər” nağıllarının işıq üzü gördüyünü bildirib. O, gələcək yaradıcılığında uşaq kitablarına, xüsusilə uşaqların fərdi inkişafına yönəlmiş əsərlərə yer verəcəyini qeyd edib.

Son illərin ən çox satılan əsəri “Bu şəhərdə kimsə yoxdur” romanı haqqında sualı cavablandırarkən isə R.Abdullaoğlu tezliklə adıçəkilən əsərin əsasında teleserial çəkiləcəyini və artıq bununla bağlı yerli telekanallardan biri ilə razılaşdıqlarını da açıqlayıb. Serialın artıq bu ilin sonlarında yayımlanmağa başlanacağı gözlənilir.

Müəllif “Relslər üzərinə uzanmış adam” romanının da ssenarisini Mədəniyyət Nazirliyinin keçirdiyi film müsabiqəsinə təqdim edildiyini də bildirib.

Qeyd edək ki, beş gün davam edən sərgidə Mədəniyyət Nazirliyinin apardığı sorğuya əsasən, Rövşən Abdullaoğlu “Ən çox oxunan müəllif” nominasiyasının qalibi olub. Bununla əlaqədar yazıçı nazirlik tərəfindən xüsusi mukafata layiq görülüb.