ABŞ-da açıqlanan iqtisadi göstəricilərdən sonra birjalarda major valyutalar dollar qarşısındakı güclü mövqelərini qoruya bildilər.

Ölkədə işsizlik müavinəti üçün ilk dəfə müraciət edənlərin sayı proqnozları aşaraq 231 min nəfərlə 3 ayın əmaksimumuna yüksəldi.

Davam edən işsizlik müavinəti müraciətlərinin sayı 1 milyon 865 min ilə iki ilin maksimumlarına çatdı.

Analitiklər məlumatların əmək bazarında son yumşalma siqnalları ilə uyğunlaşdığını ifadə edərək, bu həftə inflyasiyanın da yavaşlama əlamətləri göstərdiyini xatırladıblar.

Digər tərəfdən, şəbəkə, bulud və kibertəhlükəsizlik həlləri təqdim edən “Cisco Systems” şirkətinin balans hesabatında zəif istiqamətləndirmədən sonra səhmlərinin təxminən 10% ucuzlaşması diqqət çəkib.

ABŞ-ın pərakəndə nəhəngi “Walmart”-ın səhmləri də tam illik mənfəət proqnozunu aşağı saldıqdan sonra 8%-dən çox dəyər itirib.

ABŞ Federal Ehtiyatlar Sistemi (FED) rəsmilərinin açıqlamaları da izlənərkən, FED İdarə Heyətinin üzvü Lisa Kuk inflyasiyanın davamlı azalması və güclü əmək bazarı ilə iqtisadiyyatda yumşaq enişin mümkün olduğuna inandığını, lakin buna zəmanət verməyin mümkün olmadığını qeyd edib.

Kuk, FED-in faiz artımı və balansa düzəlişlər kimi addımlarının həm məcmu tələbi məhdudlaşdıraraq, həm də uzunmüddətli inflyasiya gözləntilərini möhkəm şəkildə sabit saxlayaraq inflyasiyanın azalmasına töhfə verdiyini bildirib.

Klivlend FED sədri Loretta Mester də inflyasiyanın 2%-ə doğru getdiyinə dair daha çox təsdiqləyici faktın olması gərəkdiyini vurğulamış və ABŞ iqtisadiyyatı üçün resessiya proqnozlaşdırmadığını bildirmişdir.

Pul-kredit siyasətinə dair məsələnin faiz dərəcəsinin aşağı salınması ilə bağlı olmadığını deyən Mester, məsələnin nə qədər məhdudlaşdırıcı mövqedə qalacağından getdiyini vurğuladı.

Dollar indeksi (DXY) qarşısında güclü mövqelərini qorumaqda davam edən major valyutaların qiymətlərində üfüqi dalğalanma müşahidə olunur. Belə ki, EUR/USD məzənnəsi 1.0890 - 1.0830, GBPUSD məzənnəsi 1.2500 - 1.2380, USD/JPY məzənnəsi isə 151.00 - 150.00 aralığında üfüqi tendensiya sərgiləyir. Çərşənbə günü 1956$-a kimi geri çəkilən qızıl isə (XAUUSD) bu səviyyədən dəstək olaraq yenidən 1987$-a kimi bahalaşdı. “Buğalar” qiyməti 1970$ həddinin üzərində qoruyub saxlaya bilsələr, artım tendensiyası 2010$-a kimi davam edə bilər.

Bu gün isə Bakı vaxtı ilə saat 12:30-da Avropa Mərkəzi Bankının sədri Kristin Laqardın çıxışı, eləcə də saat 14:00-da Avrozonada açıqlanacaq İstehlak Qiymətləri İndeksi göstəriciləri major valyutaların, əsasən də EUR/USD və GBP/USD məzənnələrinin qiymətlərinə ciddi təsir edə bilər. Saat 17:30-da isə Amerikanın tikinti sektoruna dair statistik rəqəmlər dərc olunacaq.

Məlumat İnvest-AZ İnvestisiya Şirkətinin analitikləri tərəfindən hazırlanıb.