2023-cü il yanvar-sentyabr aylarında Gəncə şəhərində sənayenin vəziyyəti haqqında məlumatlar açıqlanıb.

Marja.az Gəncə Şəhər Statistika İdarəsinə istinadən xəbər verir ki, 2023-cü ilin yanvar-sentyabr aylarında Gəncə şəhərində fəaliyyət göstərən sənaye müəssisələri və fiziki şəxslər tərəfindən faktiki qiymətlərlə 427,5 milyon manatlıq sənaye məhsulu istehsal edilmiş və sənaye xarakterli xidmətlər göstərilmişdir.

Məhsulun və xidmətlərin 107,5 milyon manatı, yaxud 25,1 faizi dövlət sektorunun sənaye müəssisələri, 320,0  milyon manatı, yaxud 74,9 faizi qeyri-dövlət sektorunun sənaye müəssisələri və fərdi sahibkarlıq fəaliyyəti ilə məşğul olan təsərrüfat subyektləri (fiziki şəxslər) tərəfindən istehsal edilmişdir.

Sənayedə muzdla çalışan 6867 nəfər işçinin (dövlət sektorunda 4002 nəfər,  qeyri-dövlət sektorunda 2865 nəfər) hər birinə verilən orta aylıq əməkhaqqı 673,6 manat təşkil etmişdir. Dövlət sektorunda işçilərin orta aylıq əməkhaqqı 650,5 manat, qeyri-dövlət sektorunda 705,8 manat təşkil etmişdir.   

Emal sektorunun müəssisələri tərəfindən 318,0 milyon manatı, yaxud  82,9 faizi qeyri-dövlət sektoruna aid olmaqla 383,8 milyon manatlıq məhsul istehsal edilmiş və sənaye xarakterli xidmətlər göstərilmişdir. Bundan 95,5 milyon manat qida məhsulları istehsalı, 10,2 milyon manat içki, 181,4 milyon manat metallurgiya sənayesi məhsulları, 65,7 milyon manat avtomobil, qoşqu və yarımqoşquların istehsalı və 31,0 milyon manat digər məhsulların istehsalı təşkil etmişdir. Cari ilin yanvar-sentyabr ayları ərzində 66,7 min ton un, 35,8 ton makaron, 115,2 min dekalitr araq, 103,7 min dekalitr şərab, 541 ədəd traktor, 256 ədəd MAZ yük avtomobili, 15489,6 ton emal edilməmiş alüminium ərintiləri (ilkin şəkildə), 50 ədəd taxılyığan kombaynlar, 4932 ədəd elektron və 150664 ədəd mexaniki su sayğacları istehsal edilmişdir.

Elektrik enerjisi, qaz və buxar istehsalı, bölüşdürülməsi və təchizatı sektorunun müəssisələri tərəfindən 2023-cü il yanvar-sentyabr ayları ərzində 24,4 milyon manatlıq məhsul istehsal edilmiş və xidmətlər göstərilmiş, yaxud əhaliyə və digər istehlakçılara 286,73, milyon kVt.saat elektrik enerjisi, 120,9 milyon kub metr qaz, 12,42 min Q.kalori istilik enerjisi bölüşdürülmüşdür. 

Su təchizatı, tullantıların təmizlənməsi və emalı sektorunda 17,9 milyon manatlıq məhsul istehsal edilmiş və xidmətlər göstərilmiş, yaxud 7,11 milyon kub metr su bölüşdürülmüşdür.