Artıq Bakı, Gəncə və Sumqayıt şəhərlərində bir sıra zonalarda avtomobillərin parklanması qanuni ödənişlidir. Bu xidmətin idarə olunması "AzParking" MMC şirkətinə tapşırılıb. Şirkət tərəfindən "AzParking" mobil tətbiqi istifadəyə verilib.

Marja.az-ın məlumatına görə, avtomobil sahibləri "AzParking" şirkətilə əlaqə saxlamaq üçün telefon nömrələrini tapa bilmədiklərini söyləyirlər.

Həqiqətən "AzParking" şirkətinin İnternet səhifəsində, sosial media səhiflərində Şirkətin telefon nömrələri göstərilmir. Vətəndaşlar problem ilə qarşılaşan zaman Şirkət ilə əlaqə saxlayıb məlumat verə bilmirlər. Eyni zamanda, onlar problem yarandığı halda cərimə olunurlar.

"AzParking"in xidmətindən istifadə edən avtomobil sahiblərindən biri  iddia edir ki, Bakıda Sabir bağı yaxınlığında parklanma xidmətindən istifadə və buna görə ödəniş edib. Vətəndaş bildirir ki, ödənişi həyata keçirdiyi halda onun ödəniş etmədiyi görünür və hər ötən gün üzrə 10 manat cərimələnir.

Qeyd edək ki, ötən dövrdə "AzParking" haqqında Marja.az saytında dəfələrlə xəbər yayımlanıb və bu xəbərlərə görə axtarış sistemlərində "Azparking"sözünü yazdıqda Marja.az-dakı xəbərlər ön səhifələrdə çıxır. Bu xəbərlər üzərindən saytımıza daxil olan axtarış edənlər Marja-nın telefon nömrələrini götürüb redaksiyamıza zəng vururlar. Bu zənglərin sayı-hesabı yoxdur. Onlar "AzParking"dən istifadə zamanı problemlə qarşılaşdıqlarını, Şirkətə məlumat vermək üçün telefon nömrəsini əldə edə bilmədiklərini söyləyirlər.

Araşdırmamız zamanı müəyyən etdik ki, "AzParking" mobil tətbiqinin "Profil" kateqoriyasının, "Dəstək" hissəsində "Zəng edin"də AYNA-nın 141 telefon nömrəsi göstərilib. Bu nömrəyə də zəng vurduqda uzun müddət gözələmək lazım gəlir. Biz 141 nömərəsilə əlaqə saxladıq - yalnız musqini və  "Sizin zənginiz hazırda növbədə 5-cidir" məlumatını eşitdik. Vətəndaşların tez tapmaları üçün bu nömrəni proqramda gizli yerdə deyil, ön səhifədə yerləşdirmək olardı.

Maraqlıdır, xidmət "AzParking" şirkətinə tapşırıldığı halda nə üçün dəstək xidmətini dövlət qurumu olan AYNA göstərməlidir? Əgər "AzParking" MMC şirkəti parklanma xidmətini idarə edib haqq alırsa, operativ Dəstək xidmətini də özü göstərməlidir.

Hesab edirik ki, "AzParking" Şirkətinin güclü Zəng Mərkəzi yaradılmasına və sorğulara operativ cavab verilməlməsinə böyük ehtiyac var. Azərbaycan Yerüstü Nəqliyyat Agentliyi (AYNA) bu məsələyə təcili müdaxilə etməli, vətəndaşların əzab-əziyyətinə son qoyulmalıdır.