1,7 trilyon dollarlıq büdcə kəsiri

1,7 trilyon dollarlıq büdcə kəsiri

ABŞ federal hökumətinin büdcə kəsiri 2022-ci illə müqayisədə 23 faiz artaraq 2023-cü maliyyə ilində 1,7 trilyon dollara çatıb.

ABŞ Maliyyə Nazirliyi sentyabr və 2023-cü maliyyə ili üçün büdcə balansı hesabatını dərc edib.

Marja xəbər verir ki, 1 oktyabr 2022-ci ildə başlayan və 30 sentyabr 2023-cü ildə sona çatan 2023 maliyyə ilinin son ayında (sentyabrda) federal hökumətin büdcə kəsiri 171 milyard dollar olaraq hesablanıb.

Federal hökumətin keçən ilin eyni ayında 430 milyard dollarlıq büdcə kəsiri var idi. Belə ki, sentyabrda büdcə kəsiri ötən ilin eyni ayı ilə müqayisədə 60 faiz azalıb.

Sentyabrda hökumətin gəlirləri əvvəlki ilin eyni ayına nisbətən 4,2 faiz azalaraq 467,5 milyard dollar, xərcləri isə 30,4 faiz azalaraq 638,5 milyard dollar olub.

Gəlirlər azalıb, federal borc üzrə faiz xərcləri artıb

ABŞ federal hökumətinin 2023-cü maliyyə ili üçün ümumi büdcə kəsiri 1,7 trilyon dollar təşkil edib. 2022-ci maliyyə ilində ölkənin büdcə kəsiri 1,4 trilyon dollar olaraq qeydə alınmışdı. Belə ki, 2023-cü maliyyə ilində büdcə kəsiri ötən illə müqayisədə 23 faiz artıb.

Büdcə kəsirinin artması, aşağı gəlir vergisi yığımları səbəbindən gəlirlərin azalması və faiz dərəcələrinin artması səbəbindən federal borcun faiz xərclərinin artması ilə əlaqədardır.

2023-cü maliyyə ilində federal hökumətin gəlirləri keçən illə müqayisədə 9,3 faiz azalaraq 4,4 trilyon dollara düşdüyü halda, eyni dövrdə xərcləri 2,2 faiz azalaraq 6,1 trilyon dollar olub.

Mövzu ilə bağlı açıqlamasında ABŞ-ın Maliyyə Naziri Janet Yellen qlobal mənfi proseslərə baxmayaraq ölkə iqtisadiyyatının dayanıqlılığını qoruduğunu və ABŞ-ın 2023-cü ildə tənəzzülə girəcəyi ilə bağlı gözləntilərin özünü doğrultmadığını bildirib.

ABŞ prezidenti Co Bayden administrasiyasının ölkə iqtisadiyyatının “sağlam və dayanıqlı inkişafa” keçidini istiqamətləndirməyə diqqətini davam etdirdiyini qeyd edən Yellen deyib: “Çətinliklərin öhdəsindən gəlməkdə qərarlıyıq".

23.10.2023 09:08

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az