"Naxçıvanbank" ASC 2023-cü ilin 9 ayını (yanvar-sentyabr) 11 milyon 360 min manat xalis mənfəət ilə başa vurub. Bank ötən ilin eyni dövrünü 12 milyon 441 min manat xalis mənfəət ilə bağlamışdı. Bankın xalis mənfəətindəki 1 milyon 82 min manat və ya 8,7% azalma əsasən bu ilin 9 ayında mənfəət vergisi ödənilməsi ilə əlaqədardır.

FAİZ GƏLİRLƏRİ ARTIB

Marja.az-ın məlumatına görə, 2023-сü ilin yanvar-sentyabr aylarında "Naxçıvanbank"ın faiz gəlirləri 3 milyon 575 min manat və ya 24% artaraq 18 milyon 470 min manat, qeyri-faiz gəlirləri isə 1 milyon 183 min manat və ya 26,7% azalaraq 3 milyon 243 min manat təşkil edib. 

"Naxçıvanbank" cəmi əməliyyat gəlirlərinin (faiz və qeyri faiz gəlirlərinin) 2 milyon 392 min manat artmasına qarşılıq, cəmi əməliyyat xərcləri (faiz və qeyri-faiz xərcləri) 2 milyon 978 min manat artıb. Xərclər gəlirlərdən 586 min manat daha çox artdığından Bankın əməliyyat mənfəəti də bu məbləğdə azalaraq, 2022-ci ilin 9 ayında 12 milyon 914 min manat ikən, 2023-cü ilin 9 ayında 12 milyon 327 min manat təşkil edib.

Həmçinin 2023-сü ilin yanvar-sentyabr aylarında aktivlər üzrə mümkün zərərlərin ödənilməsi üçün xüsusi ehtiyatdan azad olmuş 835 min manatın hesabına "Naxçıvanbank"ın mənfəəti 13 milyon 162 min manata yüksəlib. Bank mənfəətindən 1 milyon 803 min manat mənfəət vergisi ödəyib.

Ötən ilin 9 ayında "Naxçıvanbank" əməliyyat mənfəətindən ehtiyatın yaradılmasına 472 min manat ayırmışdı və mənfəət vergisi ödəməmişdi.

KREDİT PORTFELİ ARTIB 

30 sentyabr 2023-cü il tarixində "Naxçıvanbank" tərəfindən müştərilərə verilmiş cəmi kreditlər 202 milyon 500 min manat təşkil edib ki, bu da ötən ilin sonu ilə müqayisədə 28 milyon 877 min manat və ya 16,6% çoxdur. Eyni dövrdə Bankın cəmi aktivləri 43 milyon 981 min manat və ya 17,7% azalaraq 302 milyon 482 min manata düşüb. Aktivlərdəki azalma Bankın depozit portfelindəki azalmadan qaynaqlanır. Ötən ilin sonu ilə müqayisədə "Naxçıvanbank"da depozitlər 51 milyon 853 min manat və ya 33,4% azalaraq 103 milyon 563 min manata düşüb.

"Naxçıvanbank"  cari ilin 9 ayında qiymətli kağızlara investisiyalarını 3 dəfə azaldaraq 27 milyon 139 min manata endirib. 

Bu ilin 9 ayında "Naxçıvanbank" rezident maliyyə institutlarından 75 milyon 135 min manat kredit alıb.

30 sentyabr 2023-cü il tarixində "Naxçıvanbank" ASC 99 milyon 981 min manat məcmu kapitala malik olub.

"Naxçıvanbank" ASC-nin 10 filialından 9-u Naxçıvandadır. Bu ildən Naxçıvan Muxtar Respublikasında bir neçə bank filialını açıb. Rəqabətin artdığı bir şəraitdə "Naxçıvanbank"ın kredit portfelini artırması, gəlirlərini və mənfəətini qoruyub saxlaması xüsusi vurğulanmalıdır.