"Premium Bank" ASC 2023-cü ilin 9 ayını (yanvar-sentyabr) 7 milyon 881 min manat xalis mənfəət ilə başa vurub. Bank ötən ilin eyni dövrünü 4 milyon 12 min manat xalis mənfəət ilə bağlamışdı. Beləliklə, "Premium Bank"ın xalis mənfəəti bu ilin 9 ayında ötən ilin eyni dövrü ilə müqayisədə 3 milyon 869 min manat və ya 49% artıb.

FAİZ GƏLİRLƏRİ ARTIB

Marja.az-ın məlumatına görə, ötən ilin 9 ayı ərzində "Premium Bank"ın faiz gəlirləri 22 milyon 934 min manat ikən, 2023-cü ilin 9 ayında 23 milyon 998 min manata kimi yüksəlib. Ötən ilin yanvar-sentyabr dövründə Bankın qeyri-faiz gəlirləri 12 milyon 913 min manat ikən, cari ilin 9 ayında 13 milyon 668 min manat olub.

2023-cü ilin 9 ayı ərzində “Premium Bank”ın cəmi əməliyyat gəlirləri (faiz və qeyri-faiz gəlirləri) 37 milyon 666 min manat, cəmi əməliyyat xərcləri (faiz və qeyri-faiz xərcləri) 31 milyon 316 min manat, gəlirlər xərcləri üstələdiyindən əməliyyat mənfəəti 6 milyon 350 min manat təşkil edib. Eyni zamanda, mümkün zərərlər üçün yaradılan məqsədli ehtiyatlardan azad olmuş 1 milyon 530 min manat mənfəətə əlavə olunub.

Ötən ilin 9 ayında Bankın cəmi əməliyyat gəlirləri 35 milyon 847 min manat, cəmi əməliyyat xərcləri 28 milyon 123 min manat, əməliyyat mənfəəti 7 milyon 724 min manat, mümkün zərərlər üçün yaradılan məqsədli ehtiyatlar  3 milyon 712 min manat təşkil etmişdir. 

Cari ilin Bankın faiz xərcləri 5% artaraq 7 milyon 827 min manat, qeyri-faiz xərcləri isə 13,5% arataraq 23 milyon 489 min manat təşkil edib.

BANK AKTİVLƏRİ VƏ KREDİT PORTFELİ AZALIB

30 sentyabr 2023-cü il tarixində “Premium Bank” 677 milyon 356 min manat cəmi aktivlərə, o cümlədən 433 milyon 26 min manat kredit portfelinə (müştərilərə verilmiş kreditlər) malik olub. Bank ötən ilin sonunda 692 milyon 202 min manat cəmi aktivlərə, o cümlədən 436 milyon 968 min manat kredit portfelinə malik idi.

Aktivlər ilin əvvəlindən 2.14% (14 milyon 846 min manat) o cümlədən kredit portfeli üzrə 0.9%  (3 milyon 942 min manat) azalmışdır. Baxmayaraq ki, kredit portfelinin biznes kreditləri 9 milyon 732 min manat azalıb, lakin istehlak və daşınmaz əmlakın alınması üzrə kreditlərdə 5 milyon 791 min manat artım müşahidə olunub. Bu da Bankın korpartiv bankçılıqdan retail yönümlü siyasətin aparılmasını göstərir.

BANKIN DEPOZİT PORTFELİ AZALIB

2023-cü ilin 9 ayında ötən ilin eyni dövrü ilə müqayisədə “Premium Bank”da fiziki şəxslər üzrə depozitlər 1,19% (4 milyon 55 min manat) azalaraq 336 milyon 608 min manat və hüquqi şəxslər üzrə 8.84% (11 milyon 136 min manat) azalaraq 114 milyon 691 min manat təşkil edib. Depozit potfeli  üzrə azalma müştərilərin cari hesablarındakı vəsaitdən istifadə ilə bağlı olmuşdur. 

30 sentyabr 2023-cü il tarixində “Premium Bank” 174 milyon 66 min manat məcmu kapitala malik olub.