"AFB Bank" ASC 2023-cü ilin 9 ayını (yanvar-sentyabr) 6 milyon 293 min manat xalis mənfəət ilə başa vurub. Bank ötən ilin eyni dövrünü 11 milyon 452 min manat xalis mənfəət ilə bağlamışdı. Beləliklə, bu il "AFB Bank"ın xalis mənfəəti 5 milyon 160 min manat və ya 45% az olub. Xalis mənfəətin azalması əməliyyat xərclərinin artması və mümkün zərərlər üçün yaradılan məqsədli ehtiyatlardan azad olan məbləğin 2 dəfə azalması ilə əlaqədardır.

FAİZ GƏLİRLƏRİ ARTIB

Marja.az-ın məlumatına görə, ötən ilin 9 ayı ərzində "AFB Bank"ın faiz gəlirləri 13 milyon 91 min manat ikən, 2023-cü ilin 9 ayında 14 milyon 925 min manata yüksəlib. Ötən ilin yanvar-sentyabr dövründə Bankın qeyri-faiz gəlirləri 7 milyon 926 min manat ikən, cari ilin 9 ayında 6 milyon 356 min manat olub.

2023-cü ilin 9 ayı ərzində "AFB Bank"ın cəmi əməliyyat gəlirləri (faiz və qeyri-faiz gəlirləri) 21 milyon 281 min manat, cəmi əməliyyat xərcləri (faiz və qeyri-faiz xərcləri) 16 milyon 934 min manat, gəlirlər xərcləri üstələdiyindən əməliyyat mənfəəti 4 milyon 347 min manat təşkil edib. Eyni zamanda, mümkün zərərlər üçün yaradılan məqsədli ehtiyatlardan azad olmuş 1 milyon 946 min manat mənfəətə əlavə olunub.

Ötən ilin 9 ayında Bankın cəmi əməliyyat gəlirləri 21 milyon 17 min manat, cəmi əməliyyat xərcləri 13 milyon 452 min manat, əməliyyat mənfəəti 7 milyon 565 min manat, mümkün zərərlər üçün yaradılan məqsədli ehtiyatlardan azad olmuş məbləğ 3 milyon 887 min manat təşkil etmişdi. 

Bankın faiz xərcləri 73,1% artaraq 3 milyon 521 min manat, qeyri-faiz xərcləri isə 17,1% arataraq 13 milyon 412 min manat təşkil edib.

BANK BÖYÜYÜB

30 sentyabr 2023-cü il tarixində "AFB Bank" 304 milyon 624 min manat cəmi aktivlərə, o cümlədən 169 milyon 619 min manat kredit portfelinə (müştərilərə verilmiş kreditlər) malik olub. Bank ötən ilin sonunda 282 milyon 381 min manat cəmi aktivlərə, o cümldən 170 milyon 854 min manat kredit portfelinə malik idi. 

"AFB Bank"ın qiymətli kağızlara investisiyaları 2,3 dəfə artaraq 42 milyon 594 min manata çatıb. 

BANKIN DEPOZİT PORTFELİ ARTIB

2023-cü ilin 9 ayında ötən ilin eyni dövrü ilə müqayisədə "AFB Bank"da depozitlər 30 milyon 1 min manat və ya 25,8% artaraq 146 milyon 169 min manata yüksəlib. Bankda həm fiziki şəxslərin. həm də hüquqi şəxslərin depozitləri artıb.

30 Sentyabr 2023-cü il tarixində "AFB Bank" 75 milyon 164 min manat məcmu kapitala malik olub.