Naxçıvan əlverişli günəş radiasiyasına və 5000 MVt həcmində bərpa olunan enerji potensialına malikdir.

Bunu energetika naziri Pərviz Şahbazov Naxçıvanda keçirilən Azərbaycan-Türkiyə III Enerji Forumu və "Naxçıvan - yaşıl enerji zonası" Beynəlxalq Konfransı zamanı bildirib.

"Əlverişli günəş radiasiyasına və 5000 MVt həcmində bərpa olunan enerji potensialına malik Naxçıvanda külək və günəş enerjisi üzrə təqribən 1500 MVt-lıq istehsal güclərinin xarici investisiya hesabına yaradılması və onun ən azı 1000 MVt-nın ixracı strateji hədəfimizdir və biz bununla bağlı artıq fəaliyyətə başlamışıq", - nazir qeyd edib.

Onun sözlərinə görə, “TotalEnergies” və “Nobel Energy” şirkətləri ilə ümumi gücü 650 MVt olan günəş elektrik stansiyalarının inşası və istehsal ediləcək elektrik enerjisinin Türkiyəyə ixracı üzrə əməkdaşlıq edilir. “Nobel Energy” şirkəti ilkin mərhələdə 100 MVt gücündə günəş elektrik stansiyasını istifadəyə verməyi planlaşdırır.

Nazir bildirdi ki, “Masdar” şirkəti ilə ilkin mərhələdə gücü 150 MVt olan günəş elektrik stansiyasının tikilməsi nəzərdə tutulur. “Czech Engineering” şirkəti isə Sədərək rayonunun Türkiyə ilə sərhədində günəş elektrik stansiyalarının inşası, enerji ötürücülərinin tikilməsi və istifadəsi üzrə əməkdaşlıqda maraqlıdır.

"Həmçinin Almaniyanın “Notus” şirkəti Naxçıvanda yaşıl enerji layihələri reallaşdırmaq niyyətindədir. İlkin mərhələdə pilot layihə olaraq 70 MVt-lıq günəş elektrik stansiyası Naxçıvanın şimal-qərbində - Türkiyə ilə sərhəd xəttinə yaxın ərazidə nəzərdən keçirilir. Göründüyü kimi Naxçıvanın yaşıl enerji potensialına, xüsusilə bu enerjinin Türkiyə istiqamətində ixracına böyük maraq var", - Pərviz Şahbazov vurğulayıb.

Nazir bildirib ki, qarşıda yeni generasiya güclərinin Naxçıvanın enerji sisteminə inteqrasiyası ilə yanaşı, elektrik enerjisinin Türkiyə və Avropaya ötürülməsi məqsədilə yeni enerji infrastrukturlarının yaradılması, ötürücü sistem operatorları arasında əməkdaşlığın qurulması, tezlik tənzimlənməsi, habelə enerji sisteminin “Elektrik Enerjisi üzrə Avropa Ötürücü Sistem Operatorları Şəbəkəsi”nə (ENTSO-E) qoşulması ilə əlaqədar həlli vacib məsələlər dayanır.

"Həm Azərbaycan-Türkiyə-Avropa elektrik dəhlizi, həm də “Cəbrayıl” enerji qovşağı sayəsində elektrik enerjisinin Zəngəzur dəhlizi ilə Naxçıvana, oradan Türkiyəyə, sonra isə Avropaya ötürülməsi ölkələrimizin enerji təchizatında strateji əhəmiyyətini artıran perspektivlərdir. Naxçıvanı yaşıl enerjinin istehsalı ilə yanaşı ixracının da mənbəyi və marşrutuna çevirəcək imkanlardır.

Bu gün bu proseslərə yalnız Azərbaycan-Türkiyə deyil, bütün maraqlı tərəflərin cəlbi bu imkanları reallığa çevirmək üçün fürsətlər yaradır. İnanırıq ki, bu fürsətləri dəyərləndirə və 2027-ci ilədək Naxçıvanda birgə nailiyyətlərə imza ata biləcəyik", - P. Şahbazov əlavə edib.

© APA