Tədris ilinin başlanmasına sayılı günlər qalmış “Kaspersky” şirkəti məşhur “SupermaM” Facebook qrupu ilə birlikdə Azərbaycanda valideynlərin övladlarının gələcəkdə kim olmasını arzuladıqlarını öyrənmək qərarına gəlib. Bu məqsədlə 3000-dən çox ananın iştirak etdiyi sorğu keçirilib. Məlum olub ki, valideynlərin əksəriyyəti övladları üçün informasiya texnologiyaları seqmentinə üstünlük verəcək: bunu respondentlərin 22%-i qeyd edib. 

Səhiyyə sektoru da perspektiv vəd edən sahələr arasındadır - hər yeddinci respondentin (14%) seçimi səhiyyə olub. Digər populyar cavablara maliyyə və hüquq xidmətləri (hər biri 4% olmaqla) daxildir. Respondentlərin kiçik hissəsi əyləncə sənayesi, ticarət, sosial biznes, idman və sənaye dizaynına üstünlük verir. Maraqlıdır ki, böyüklərin beşdə biri (20%) gələcək peşə seçimini övladının öhdəsinə buraxır.

“İnformasiya texnologiyası ən sürətlə inkişaf edən sahələrdən biridir və karyera yüksəlişi üçün geniş imkanlar təklif edir. Sorğumuz göstərdi ki, bir çox valideynlər övladlarının bu sahədə uğur qazanmasını istəyirlər. İndi istənilən yaşdan olan tələbələrə proqramlaşdırmanın əsasları, proqram hazırlanması və digər İT bacarıqlarını öyrənməyə imkan verən bir çox proqram və kurslar mövcuddur. Bununla belə, yadda saxlamaq lazımdır ki, rəqəmsal dünyada humanitar peşələrə həmişə yer olacaq, çünki bir çox yaradıcı və sosial sahələrdə hətta ən qabaqcıl maşın belə insanı əvəz edə bilməz. Ona görə də gələcək karyera seçimi yalnız konkret sənayenin populyarlığına deyil, daha çox uşağın maraq və qabiliyyətlərinə əsaslanmalıdır”, - deyə “Kaspersky”nin Azərbaycandakı rəsmi nümayəndəsi Müşviq Məmmədov qeyd edir.

“SupermaM” qrupumuzda hər bir ana övladının nə qədər unikal və istedadlı olduğunu bilir. Biz onların nailiyyətləri ilə fəxr edir və hər bir uşağın sonsuz potensialına inanırıq. Bununla belə, arzularımıza və ümidlərimizə baxmayaraq, biz həm də gələcək peşəni seçməyin hər bir uşaq üçün şəxsi və vacib qərar olduğunu anlayırıq. Bizim əsas rolumuz onların yanında olmaq, onlara bütün lazımi məlumatları vermək, düzgün yönləndirmək və ən əsası qeyd-şərtsiz dəstək olmaqdır. Qoy uşaqlarımız öz gələcəklərini öz ehtirasları və maraqları əsasında qursunlar, biz isə onların arxasında dağ kimi dayanaq”, - deyə SupermaM qrupunun admini Sofi Tsırqvava öz fikirləri ilə bölüşür.