ABŞ iqtisadiyyatının ilin ilk rübündə ehtimalların üzərində artım performansı göstərməsi fonunda dollar indeksi cümə axşamı ticarət gününü artımla başa vurdu.

ABŞ Ticarət Nazirliyinin açıqladığı ilkin məlumatlara görə, bu ilin ikinci rübündə ölkədə ümumidaxili məhsulun həcmi (ÜDM) 2.4% artıb. Sözügedən dövrdə ölkə iqtisadiyyatının 1.8% böyüyəcəyi proqnozlaşdırılırdı.

Bundan əlavə, birinci rübdə 4.1% artan fərdi istehlak xərcləri qiymət indeksinin ikinci rübdə 2.6% artması və proqnozların altında qalması qiymət təzyiqlərinin azaldığını göstərir.

Həmçinin Amerikada ilk dəfə işsizlik müavinəti üçün müraciət edənlərin sayı iyulun 22-də bitən həftədə 221 min nəfərə enərək son 5 ayın ən aşağı səviyyəsini görüb.

ABŞ-da uzunmüddətli istifadə üçün nəzərdə tutulmuş məhsulların sifarişləri proqnozlaşdırılandan daha çox - aylıq müqayisədə 4.7% - artarkən, malların ticarət balansı isə aylıq müqayisədə 4.4% azalaraq 87.8 milyard dollar təşkil edib.

Ölkədə gözlənilən mənzil satışları indeksi isə iyun ayında azalma ehtimallarının əksinə 0.3% artaraq fevral ayından bu yana ilk artımını qeyd etdi.

Digər tərəfdən, ABŞ Federal Ehtiyatlar Sistemi (FED) böyük bankların kapital tələblərinin artırılması təklifini təsdiqləyib. Noyabrın 30-na qədər ictimai rəy üçün açıq qalacaq təklifin iri banklar üçün kapital tələblərinin ümumilikdə 16% artması ilə nəticələnəcəyi təxmin edilir.

Bankların dəyişikliklərə uyğunlaşması üçün keçid müddəalarını da ehtiva edən təklif çərçivəsində iri banklar yeni sistemə keçidə 1 iyul 2025-ci il tarixindən başlamalı və 1 iyul 2028-ci il tarixindən etibarən tam uyğunluğu təmin etməlidirlər.

Bugün isə Almaniyada açıqlananacaq ÜDM-in həcmi və İstehlak Qiymətləri İndeksi göstəriciləri, eləcə də Amerikada dərc olunacaq şəxsi xərclərə dair statistiq rəqəmlər investorların diqqət mərkəzində olacaqdır. 

Qeyd edək ki, hazırda 101.80 bənd səviyyəsində qərarlaşan DXY-da “ayılar” qiyməti 100 bənd səviyyəsindəki psixoloji dəstək həddinin altına qaytara bilsələr, dollarda eniş tendensiyası dərinləşə bilər. “Buğalar”ın güclü olduğu bir ssenaridə isə 103.50 bənd səviyyəsi olduqca önəmli psixoloji hədd olaraq aktuallığını qoruyur.

Məlumat İnvest - AZ İnvestisiya Şirkətinin analitikləri tərəfindən hazırlanıb.