2023-cü ilin sonuna qədər 1 ABŞ dolları 100 rubldan yuxarı qalxa bilər. Dolların 120 rubla yüksəlməsi isə yalnız qlobal maliyyə böhranı zamanı mümkündür.

Marja.az xəbər verir ki, bunu rusiyalı analitiklər hesab edirlər.

"Mövcud şəraitdə dolların məzənnəsinin 120 rubla yüksəlməsi mümkün görünmür və rublun belə əhəmiyyətli dərəcədə zəifləməsi müəyyən risklərin reallaşmasını tələb edir. İlk növbədə, inkişaf etmiş ölkələrdə tam maliyyə böhranı başlamalıdır. İndiyə qədər bazarda ABŞ Federal Ehtiyat Sisteminin (FED) uçot dərəcəsini bu il artırmaq ehtimalı cəmi 14% təşkil edir. Bununla belə, ABŞ əmək bazarı gözləniləndən daha yüksək səviyyədə qala bilər",- "Bank Sankt-Peterburq"un Maliyyə Bazarlarında Əməliyyatlar Departamentinin baş analitiki Viktor Qriqoryev deyir.

Bu baxımdan, ABŞ tənzimləyicisi gələn həftə keçiriləcək yığıncağından sonra pul siyasətinin sərtləşdirilməsi tsiklini davam etdirsə, bu da bank sektorunda yeni problemləri üzə çıxara və öz növbəsində resessiyaya gətirib çıxara bilər.  Qriqoryev qeyd edib ki, bu halda dünya əmtəə bazarında qiymətlər aşağı düşəcək ki, bu da Rusiya ixracının azalmasına, rubla təzyiqin artmasına səbəb olacaq.

"Bununla belə, belə bir ssenarinin baş vermə ehtimalı hələ də aşağıdır - bir sıra ölkələrdə iqtisadi artımın ləngiməsi gözlənilir, lakin bu, tam miqyaslı tənəzzülün başlanması demək deyil",- o əlavə edib.

"Baza proqnoza görə, məzənnə ilin sonuna kimi zəifləyəcək,onun dəyəri Yeni il qabağı bir ABŞ dolları üçün 100 rublu bir qədər keçəcək. Payızda rublun daha çox ucuzlaşması üçün xarici vəziyyətin kəskin pisləşməsi (ixracın azalması) lazımdır", - "Ingosstrakh Investments"in baş makroiqtisadçısı Anton Prokudin deyib.

O, əlavə edib ki, payızda əmtəə qiymətlərinin, o cümlədən neft və qaz qiymətlərinin kəskin düşəcəyi gözlənilmir.

Cümə axşamı, "Alfa-Investments" Teleqram kanalında bir dolları 80-120 rubl diapazonunda qiymətləndirib. Qeyd edilib ki, Rusiya valyutasının zəifləməsi riskləri hələ də qalmaqdadır - məzənnə həm geosiyasətə, həm də neft hasilatına qoyulan məhdudiyyətlərə reaksiya verəcək.

Qeyd edək ki, hazırda 1 dolların qiyməti 90 rubldan yüksəkdir.