Ötən həftənin son ticarət günü Amerikada proqnozların çox altında açıqlanan NFP göstəricilərindən sonra dollar indeksi (DXY) həftəni 102.30 bənd həddlərində tamamladı.

Cümə günü iyunun əmək bazarı hesabatı fonunda investorların FED-in bu ay faiz dərəcələrini artırmağa davam edəcəyinə ehtimalları daha çox inam qazandı.

ABŞ iqtisadiyyatı iyun ayında son iki il yarımda ən aşağı məşğulluğu yaratdı, lakin davamlı olaraq artan əmək haqqları əmək bazarı şərtlərinin sıx olaraq qaldığını göstərdi.

Bu həftə Amerikada dərc olunacaq inflyasiya göstəriciləri DXY-da tendensiyanın necə davam edəcəyinə dair bir çox suallara aydınlıq gətirəcək.

Çərşənbə günü açıqlanan İstehlak Qiymətləri İndeksinin iyun ayında illik müqayisədə 3.1% artacağı proqnozlaşdırılır ki, bu da 2021-ci ilin martından bəri ən yavaş artımdır. Qeyri-sabit ərzaq və yanacaq qiymətlərini istisna edən İstehlak Qiymətləri Baza İndeksinin may ayında 5.3%-lik cüzi bir artımla, illik müqayisədə 5% təşkil edəcəyi ehtimal edilir. Bu, FED-in 2% hədəfindən iki dəfə çoxdur.

İnvestorlar, həmçinin Minneapolis FED-in sədri Nil Kaşkari, Klivlend FED-in sədri Loretta Mester, San Fransisko FED-in sədri Meri Deyli və FED-in administrasiyasından Kristofer Uoller ilə birlikdə həftə ərzində bir çox FED rəsmisinin açıqlamalarını izləyəcəklər.

Həmçinin cari ticarət həftəsi ərzində İngiltərədə ÜDM-in həcmi və əmək bazarı hesabatı, Almaniyada İstehlak Qiymətləri İndeksi, Yeni Zellandiya və Kanada Mərkəzi Banklarının faiz qərarları birjaların diqqət mərkəzində olacaq.

Ötən həftəni 102.30 bənd səviyyəsində başa vuran DXY-da qiymətlər 103.50 bənd səviyyəsindəki psixoloji müqavimət həddinin altında qaldığı müddətcə, eniş tendensiyası 100 bənd hədlərinə kimi davam edə bilər.

EUR

Ötən həftənin son günü bahalaşaraq həftəni 1.0950 həddinin üzərində tamamlayan EURUSD məzənnəsində qiymətlər 1.10$-ın üzərinə yüksələ və bu həddin üzərində möhkəmlənə bilsə, artım tendensiyası davam edə bilər. Bu həftə Almaniyada açıqlanacaq inflyasiya göstəriciləri, Avrozonada sənaye istehsalının həcmi, ticarət saldosuna dair rəqəmlər və Avropa Mərkəzi Bankının son toplantısının dərc olunacaq protokolları avronun dollar qarşısında qiymətlərinə təsir edə bilər.

GBP

Dollar qarşısında ötən həftə 1.2650 həddindən dəstək alaraq 1.2850 hədlərinə kimi bahalaşan GBPUSD məzənnəsində qiymətlərin necə dəyişəcəyi ilə bağlı suallara aydınlıq gətirmək üçün bu həftə investorlar İngiltərədə dərc olunacaq Ümumdaxili məhsulun həcmi, əmək bazarına dair nəticələri diqqət mərkəzində saxlayacaqlar. 

Məlumat İnvest-AZ İnvestisiya Şirkətinin analitikləri tərəfindən hazırlanıb.