Bu yaxınlarda Masallıda kartof əkini ilə məşğul olan fermerlərin üzləşdiyi problemdən yazmışdıq. Məhsulları bol olan fermerlər kartofun hazırkı qiymətindən və rayonda saxlanma anbarlarının olmamasından gileylənmişdilər.

Masallının Təklə, Ləngan, Əhmədli və bu kəndlərə yaxın ərazilərdə kartof əkini ilə məşğul olan fermerlər məhsulun bol olmasına sevinsələr də, satışı ilə bağlı üzləşdikləri problem onların bu sevincini ürəyində qoyub. Fermerlər toxumu baha qiymətə aldıqlarını, min bir əziyyətlə məhsul yetişdirdiklərini, lakin çox ucuz qiymətə satmaqla ziyan etdiklərini bildirmişdilər. Fermerlərin problemi işıqlandırıldıqdan sonra Kiçik və Orta Biznesin İnkişafı Agentliyi (KOBİA) hərəkətə keçib.

KOBİA-nın əməkdaşları rayonun ən çox, 150 hektar sahədə kartof yetişdirən Böyük Təklə kəndinin fermerləri ilə görüşüb, problemlə yerindəcə tanış olublar.

Fermer Pərviz Həsənov bildirir ki, KOBİA-nın əməkdaşları onların problemini dinlədikdən sonra bu məsələnin həlli ilə bağlı kömək edəcəklərinə söz veriblər: “Sağ olsun dövlətimiz, üzləşdiyimiz problemə belə tez reaksiya verildi. Ümid edirik ki, yaxın zamanda digər bölgələrdə olduğu kimi, bizim ərazimizdə də saxlama anbarları tikilər”.

Masallıda 10 ildən çoxdur kartof əkini ilə məşğul olan fermer Şöhrət Quliyevin də bu görüşlə bağlı ümidləri böyükdür. Deyir ki, problemlərinə belə tez reaksiya verilməsi digər fermerlər kimi, onu da ruhlandırıb. “Gələn il üçün kartof əkini ilə bağlı planımı təxirə salmışdım. KOBİA əməkdaşlarının bizimlə görüşü, problemimizi dinləməkləri məni ümidləndirdi. Üzləşdiyimiz problemi onların diqqətinə çatdırdıq. Söz verildi ki, yaxın vaxtlarda bizə kömək göstəriləcək”.

KOBİA-nın KOB dostu departamentinin müdir müavini Eldəniz Əmirovla da əlaqə saxladıq. Bildirdi ki, Masallı rayonunun Təklə kəndi ərazisində məhsulun saxlanması üçün anbarın olmaması səbəbindən fermerlərin çətinliklə üzləşməsi ilə bağlı məsələ Agentliyin də diqqətindədir. Bu məqsədlə Agentliyin regionda fəaliyyət göstərən KOB dostları Təklə kəndində olub və fermerlərlə görüşərək onların problemlərini, o cümlədən kənd təsərrüfatı məhsullarının saxlanması üçün anbarın olmaması ilə bağlı çətinliklərini dinləyiblər.

“KOBİA tərəfindən məhsul satışına dəstək göstərən qurumlar barədə fermerlərə məlumat verilib və sahibkarlar aidiyyəti qurumlarla əlaqələndirilib. Həmçinin fermerlər Masallı rayonunda fəaliyyət göstərən bir neçə saxlama anbarı olan sahibkarlarla əlaqələndirilib. Bununla belə, Təklə kəndində fermerlər tərəfindən istehsal edilən məhsulların saxlanması üçün anbarın olmaması nəzərə alınaraq, saxlama anbarlarının tikintisi və idarəetməsi ilə məşğul olan sahibkarlıq subyektləri, eləcə də aidiyyəti qurumlar bu məsələ barədə KOBİA tərəfindən məlumatlandırılmışdır”, - deyə Eldəniz Əmirov vurğulayıb.

© Azərtac