Göyçay rayonundakı Ləkçıplaq kəndinin sakini fermer Vaqif Osmanov bu il 280 hektar sahədə qarğıdalı əkib.

Əkində istifadə edilən toxum Serbiyadan gətirilib. Toxum elit növü olduğundan həm toxumçuluq, həm də yem məqsədilə istifadə baxımından yararlıdır. Becərmə mərhələsində sahələrə aqrotexniki qulluq göstərilib və yaxşı bitiş alınıb. Mallı-Şıxlı kəndindəki qarğıdalı sahəsində bunun şahidi olduq. Fermer dedi ki, hər gün sahələrdə oluruq. Suvarma, kultivasiya, gübrə və herbisidlər vaxtlı-vaxtında aparılır. İstifadə olunan gübrəni də bizə 70 faiz güzəştlə verirlər.

Fermer söhbət əsnasında onu da dedi ki, 1 hektar sahədən götürülən məhsulun 35 sentneri çəkilən xərcləri tam ödəyir. Qarğıdalının məhsuldarlığı isə hektardan orta hesabla 80-100 sentnerdir. Təbiətin şıltaqlığı olmasa, bundan da yüksək qazanc əldə etmək olar.

V.Qasımov Ləkçıplaq bələdiyyəsinin ərazisində biçilən taxılın yerində 35 hektara qarğıdalı da səpdirib. Həmin sahə vaxt baxımından dən bağlamağa yetməyəcəyi üçün satışı silos şəklində təşkil olunacaq. Onu da yaş kütlə halında tonu 30-40 manata satdıqda mənfəətlidir. Artıq həmin məhsulu almaq üçün qonşu Ağdaş və Oğuz rayonunun maraq göstərən heyvandarlıq təsərrüfatları var.

Ümumilikdə isə qarğıdalı rayonun 13 kəndində əkilib, ən çox da Mallı-Şıxlı, Ləkçıplaq, Çərəkə və Şəkər kəndlərində. Əkin və becərmə prosesində 50-55 nəfər iştirak edir. İşçilərdən 13 nəfəri gözətçi, 26 suçu, qalanı isə toxumun, gübrənin daşınıb sahəyə verilməsində çalışır. Hamısı da qarğıdalı əkilən kəndlərin sakinləridir.
Fermer qarşısına qoyduğu məqsədə nail olsa, gələn il əkin sahələrini 500 hektara çatdırmağı nəzərdə tutub. Bu da orta hesabla 100 adamın işlə təmin olunması deməkdir. O, eyni zamanda, əkin və becərmə işlərində rayon rəhbərliyinin, o cümlədən əkin aparılan kəndlərin ərazi inzibati dairələrinin nümayəndələrinin dəstəyini də minnətdarlıqla qeyd etdi. 

© "Azərbaycan"