Bu həftə birjalarda əhəmiyyətli bir həftə olacaq. Çərşənbə günü FED 15 ay əvvəl başlayan faiz artımı tendensiyasına ilk dəfə ara verə bilər. Monetar siyasətin gələcəyi ilə bağlı suallara çərşənbə axşamı ABŞ-da açıqlanacaq inflyasiya göstəricisi aydınlıq gətirə bilər. Bu həftə həmçinin Avropa (ECB) və Yaponiya Mərkəzi Bankları (BoJ) da uçot dərəcələrinə dair qərarlarını elan edəcəklər.

Bəzi FED rəsmiləri bu fasilənin faiz dərəcələrinin artıq pik həddə çatdığına işarə kimi qəbul edilməməsi gərəkdiyini vurğulasalar da, birjalarda qiymətlərin formalaşmasında iyulda 25 baza bəndlik artım, dekabrda ayında isə oxşar həcmli faiz endirimi ehtimallarının təzyiqi hiss olunur.

Makroiqtisadi göstəricilərə gəldikdə isə ən son açıqlanan iqtisadi məlumatlar ABŞ iqtisadiyyatının qarışıq mənzərəsini yaradır. Beləki, inflyasiya mülayim olaraq qaldığı üçün maaş artımı yavaşlayıb. Lakin, İstehlak Qiymətləri İndeksi hələ də mərkəzi bankın 2%-lik hədəfindən xeyli yuxarı olaraq proqnozlaşdırılır. 

FED həmçinin bank sektoru böhranının iqtisadiyyata təsirini izləyir və Mərkəzki Bank rəsmiləri təklif edir ki, daha sərt kredit standartları inflyasiyanın cilovlanmasına kömək edə və aqressiv monetar sərtləşdirmə ehtiyacını azalda bilər.

Çərşənbə axşamı günü FED iclasına başlayarkən, ABŞ-ın son inflyasiya hesabatına əsaslanacaq.

Manşet inflyasiyanın aprel ayındakı 0.4%-lik artımdan sonra may ayında aylıq müqayisədə 0.3% artacağı ehtimal edilir. Baza inflyasiyanın isə 0.4% artacağı proqnozlaşdırılır.

Ötən həftəni də 103.50 bənd səviyyəsində başa vuran DXY-da “buğalar” qiymətləri səviyyəsindəki psixoloji müqavimət həddinin üzərində qoruyub saxlaya bilsələr, artım tendensiyası daha kəskin xarakter ala bilər.

EUR

FED qərarından bir gün sonra toplanacaq Avropa Mərkəzi Bankının FED-dən fərqli olaraq faiz dərəcələrini artıracağı ehtimal edilir. Bazarlar iyul ayında da oxşar rüblük faiz artımına gediləcəyini düşünür.

ECB-nin may iclasında faiz dərəcələrini 0.25% artıracağı proqnozlaşdırılır.

Xatırladaq ki, ECB prezidenti Kristine Laqarde son açıqlamasında bir daha vurğulamışdı ki, baza inflyasiyanın pik həddinə çatdığını söyləmək hələ tezdir və dərəcələrin yenidən artırılmasına ehtiyac var.

Avrozonada inflyasiya hazırda 6.1% təşkil edir ki, bu da hələ də ECB-nin 2%-lik hədəfindən üç dəfə çox, lakin keçən ilin oktyabrında zirvəsi olan 10.6%-dən aşağıdır.

Ötən həftəni 1.0740 hədlərinin üzərində tamamlayan EURUSD məzənnəsində cari ticarət həftəsində tendensiyanın formalaşmasına təsir göstərə biləcək əsas faktorlar arasında Avrozonada və Almaniyada açıqlanacaq inflyasiya göstəriciləri də yer alır. Təhlillərə əsasən EURUSD məzənnəsində qiymətlər 1.0900 həddinin altında qaldığı müddətdə, eniş tendensiyası  davam edə bilər.

GBP

Dollar qarşısında ötən həftə 1.2600 hədlərinə kimi bahalaşan funt-sterlinq burada müqavimətlə qarşılaşaraq bir qədər ucuzlaşdı və həftəni 1.2560 hədlərində başa vurdu. GBPUSD məzənnəsində qiymətlərin necə dəyişəcəyi ilə bağlı suallara aydınlıq gətirmək üçün bu həftə investorlar İngiltərədə dərc olunacaq ÜDM-in həcmi, Ticarət Saldosu, əmək bazarına dair statistik göstəricilərin necə açıqlanacağını izləyəcəklər.

Məlumat İnvestAZ şirkətinin analitikləri tərəfindən hazırlanıb.