“Almet Trading Baku” QSC şirkətinin 2 milyon manat iqtiqraz buraxılışına hazırlaşması ilə əlaqədar olaraq istehlakçılarda və iş dünyasında müəyyən çaşqınlıq yaranıb.

“Almet Holding” yaranan çaşqınlıqla bağlı açıqlama yayıb. 

Marja.az açıqlamanı təqdim edir:

"“Almet Holdinq” 2016-cı ildən ölkəmizdə və dünyanın bir neçə ölkəsində polad və polad məhsulları sahəsində fəaliyyət göstərir. Şirkətin əsas profili xammaldan yarımfabrikatlara və hazır məhsullara qədər polad çeşidli məhsulların ticarəti, eləcə də logistikası və digər əlavə dəyər xidmətləridir. Bizim keyfiyyətə tam zəmanət, alış, satış, maliyyə, sığorta və logistika həllərimiz müştərilərimiz və təchizatçılarımız üçün sərfəli təchizat zəncirinin idarə edilməsini asanlaşdırmaq üçün  uyğunlaşdırılmışdır. 

“Almet Holding”in Azərbaycanda ticarətçi şirkət - “Almet Trading” MMC, logistika şirkəti - “Almet Logistika” MMC, idarə edici holdinq strukturu - “Almet Holding” QSC fəaliyyət göstərir. Şirkətin eləcə də Gürcüstanda ticarətçi şirkəti - “Almet Trading Georgia” LLC, Türkiyədə ticarətçi şirkəti - “Almet Trading Turkey” LLC, Birləşmiş Krallıqda ticarətçi şirkəti - “Almet Trading UK” LLC, Birləşmiş Ərəb Əmirliklərində "Almet Trading” DMCC fəaliyyət göstərir.

"Almet Trading" əmtəə nişanı Azərbaycan Respublikası Əqli Mülkiyyət Agentliyində “Almet Trading” MMC adına qeydiyyata alınmışdır. Azərbaycan bazarında “Almet Tradig Baku” QSC adında fəaliyyət göstərən, meşə materiallarının və tikinti materiallarının satışı ilə məşğul olan şirkətin “Almet Holding”lə heç bir bağlılığı yoxdur".

“Almet Holding”in direktoru Namiq İbrahimov  sorğumuza cavab olaraq bildirdi ki, “Almet Holding 2016-cı ildən fəaliyyət göstərir. Şirkət Azərbaycan bazarı ilə yanaşı İngiltərə, Uels, Gürcüstan, Türkiyə və digər ölkələrdə təkcə metallurgiya və istehsalatla yox eyni zamanda logistika xidməti göstərir. Holdinqimiz 2022-ci ildə ümumi dövriyyəsi  130 milyon manatın üzərində olub ki, bunun da 50%-indən artığı beynəlxalq şirkətlərimizin payına düşür. Qeyd edim ki,  Holdinqimiz bu il Ağdam Sənaye Parkında yeni müəssisənin yaradılmasına 13 milyon manat investisiya yatıracaq.

"Maliyyə göstəricilərindən də göründüyü kimi, bizim güclü tərəfdaşlarımız və etibarlı resurslarımız var. Mediada “Almet Tradig Baku” QSC ilə bağlı yayılan məlumatların bizimlə heç bir bağlılığı yoxdur və yarana biləcək mənfi hallara görə məsuliyyət daşımırıq. Əlbəttə ki, adın birbaşa oxşarlığı istehlakçılarda və media nümayəndələrində çaşqınlıq yaradır. Bu da bizim brendimizə və işgüzar nüfuzumuza xələl gətirir. Artıq bununla bağlı qarşı tərəfə məlumat vermişik. Adın dəyişdirilməsi ilə bağlı Azərbaycan Respublikası İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə müraciət ünvanlayacaq və eyni zamanda hüquqi müstəvidə addımlar atacağıq”, -Namiq İbrahimov bildirib.

Qeyd edək ki, mediada yayılan məlumatlarda “Almet Trading Baku” şirkətinin mənfəətinin 2022-ci ildə ötən ilə nibətdə 2,6 dəfə azaldığı və şirkətin borclanmaya getdiyi bildirilmişdi.