(®) Artıq ikinci ildir ki Azərbaycanda müvəffəqiyyətlə həyata keçirilən “Best Managed Companies” beynəlxalq biznes müsabiqəsi 2023-cü ilin qaliblərini elan edilib.

Ölkənin biznes icmasının aparıcı şirkət nümayəndələri, Azərbaycan Respublikası İqtisadiyyat Nazirliyi və digər dövlət qurumları rəsmilərinin iştirakı ilə keçirilən mərasimdə Avrora, Metak, Norm Sement və Veysəloğlu Şirkətlər Qrupu “Best Managed Companies Azerbaijan 2023” titulu ilə təltif edildilər. 

“Best Managed Companies” layihəsi qlobal olaraq Deloitte tərəfindən 30 il ərzində 46 ölkədə uğurla həyata keçirilən müsabiqədir və əsas məqsədi yüksək biznes fəaliyyəti ilə fərqlənən yerli özəl şirkətləri cəmiyyətə tanıtmaqdır.  

Bu layihə Azərbaycanda PAŞA Bank, Azərbaycan Dövlət İqtisad Universiteti, Sahibkarlığın İnkişafı Fondu, AMCHAM Azerbaijan, İctimai Televiziyanın dəstəyi və Deloitte Azərbaycan şirkətinin təşkilatçılığı ilə həyata keçirilir. 

“Best Managed Companies Azerbaijan” layihəsinin Azərbaycanın biznes icmasına verdiyi töhfə aparıcı beynəlxalq bilik və təcrübəni paylaşmaq, ətraf mühitə qayğı və xeyriyyəçiliyə önəm verən şirkətləri tanıtmaq, yeni iş yerlərinin açılması və uğurlu bizneslərin inkişafına təkan verməkdir. Bu biznes müsabiqəsi Deloitte tərəfindən Azərbaycan hökumətinin özəl sahibkarlığın inkişaf strategiyasına dəstək verməsi üçün bir fürsətdir.

“Best Managed Companies” layihəsi çərçivəsində şirkətlər dörd meyar əsasında qiymətləndirilir: i. strategiya, ii. təşkilatın imkanları və innovasiyalar, iii. korporativ idarəetmə və maliyyənin idarə edilməsi, iv. korporativ mədəniyyət və məsuliyyət. 

Müstəqil hakimlər heyəti tərəfindən qalib şirkətlər müəyyən edilir və yekun olaraq bir neçə şirkət “Best Managed Companies Azerbaijan” titulu ilə təltif olunur.

Müstəqil hakimlər heyətinin üzvləri Azərbaycan Dövlət İqtisad Universitetinin rektoru Ədalət Muradov, "PAŞA Bank" ASC-nin İdarə Heyətinin sədri və Baş İcraçı direktoru Cavid Guliyev, BP-nin Xəzər bölgəsində Xarici əlaqələr və kommunikasiya üzrə vitse-prezidenti Bəxtiyar Aslanbəyli, “Azercell Telekom” MMC-nin prezidenti Zarina Zeynalova, Azərbaycan İnvestisiya Holdinqinin Baş İcraçı direktorunun müavini Xəyyam Məmmədov, Sahibkarığın İnkişafı Fondunun İdarə Heyətinin sədri Osman Xaliyev, “AMCHAM Azerbaijan”in prezidenti Nərgiz Nəsrullayeva-Müdüroğludur.

Best Managed Companies Mükafat Proqramının beynəlxalq tarixi

Best Managed Companies mükafat proqramı 1993-cü ildə Kanadada yaranıb və bu günə kimi uğurla həyata keçirilərək ölkənin ən nüfuzlu biznes mükafatı proqramı kimi tanınır. Azərbaycan və Kanadadan başqa, hal-hazırda bu layihə 46 ölkədə həyata keçirilir. Buraya Çin, ABD, cənub-şərqi Asiya, Niderland, Belçika, Almaniya, Danimarka, Çexiya, İtaliya, İsveç, Norveç, Türkiyə, Meksika və Çili aiddir.

Deloitte haqqında

Deloitte audit, vergi, hüquq və konsaltinq sahəsində peşəkar xidmətlər təklif etməklə, dünyanın aparıcı şirkətlərindən biridir. Deloitte Azərbaycan bazarında 20 ildən artıq müddətdə müvəffəqiyyətlə fəaliyyət göstərir və hal-hazırda Deloitte Bakı ofisində 200 nəfərə yaxın əməkdaş çalışır.