Cümə günü açıqlanan ABŞ-ın qarışıq əmək bazarı göstəriciləri hesabatı may ayında məşğulluq artımının sürətləndiyini, lakin əmək haqqı artımlarının orta səviyyədə qaldığını göstərdi. Eyni zamanda işsizlik səviyyəsinin artması da əmək bazarında şəraitin zəifləməsi fikrini dəstəklədi.

Analitiklərin fikrincə məşğulluq məlumatları FED-in qarşıdakı iclasında faiz artımını dayandıracağına dair ehtimalları gücləndirdiyini vurğulayır. Bu, FED-in aqressiv antiinflyasiya siyasətini sərtləşdirməyə başlamasından bəri ilk fasilə olacaq.

Bazar ertəsi açıqlanacaq Xidmət Sektorunda Biznes Aktivliyi İndeksi göstəricilərinin may ayında ardıcıl yeddinci aydır geriləyən Sənaye Sektorunda Biznes Aktivliyi İndeksindən fərqli olaraq artacağı proqnozlaşdırılır. 

Cari həftədə FED-in 13-14 İyun tarixlərində keçirəcəyi iclasdan əvvəl sükut dövrünün yaşanması səbəbindən pul-kredit siyasətinin perspektivinə dair rəsmi açıqlamalar gözlənilmir.

Lakin həftənin çərşənbə günü ticarət saldosu və cümə axşamı işsizlik müavinatı üçün müraciətlərin sayına dair statistik rəqəmlər investorların diqqət mərkəzində olacaq.

Ötən həftəni də 104 bənd səviyyəsində başa vuran DXY-da “buğalar” qiymətləri 103.50 bənd səviyyəsindəki psixoloji müqavimət həddinin üzərində qoruyub saxlaya bilsələr, artım tendensiyası daha kəskin xarakter ala bilər.

EUR

Ötən həftəni 1.07$ hədlərində tamamlayan EUR/USD məzənnəsində cari ticarət həftəsində tendensiyanın formalaşmasına təsir göstərə biləcək əsas faktorlar arasında Avrozonada açıqlanacaq Ümumdaxili məhsulun həcmi və Avroznada, eləcədə, Almaniyada dərc olunacaq Xidmət Sektorunda Biznes Aktivliyi İndeksi göstəricilərini qeyd etmək olar. Təhlillərə əsasən EUR/USD məzənnəsində qiymətlər 1.0900 həddinin altında qaldığı müddətdə, eniş tendensiyası daha kəskin xarakter ala bilər.

Avropa Mərkəzi Bankı inflyasiya gözləntilərinin davamlı olub-olmadığını göstərəcək istehlakçı gözləntiləri sorğusunun nəticələrini çərşənbə axşamı açıqlayacaq.

Həmçinin ECB sədri Kristin Laqard bazar ertəsi Avropa Parlamentinin İqtisadiyyat və Valyuta Məsələləri Komitəsi qarşısında ifadə verəcək və onun şərhləri yaxından izləniləcək.

Mərkəzi Bankın 15 iyun iclasından əvvəl cümə axşamı sükut dövrünə girməzdən əvvəl açıqlama verəcək digər ECB rəsmiləri arasında idarə heyətinin üzvləri Luiz de Quindos və Fabio Panetta da var.

GBP

Dollar qarşısında ötən həftə 1.2670 hədlərinə kimi bahalaşan funt-sterlinq burada müqavimətlə qarşılaşaraq yenidən ucuzlaşdı və həftəni 1.2440 hədlərində başa vurdu. GBP/USD məzənnəsində qiymətlərin necə dəyişəcəyi ilə bağlı suallara aydınlıq gətirmək üçün bu həftə investorlar İngiltərədə dərc olunacaq tikinti və xidmət sektorlarında Biznes Aktivliyi İndeksi göstəricilərinin necə açıqlanacağını izləyəcəklər.

GOLD

Ötən həftənin əvvəlində Amerikada borc böhranı ilə bağlı müzakirələrdə uzlaşmanın əldə olunması fonunda bahalaşan qızıl həftənin son ticarət günündə ABŞ-da artımla açıqlanan NFP məlumatlarından sonra yenidən 1930$-a kimi ucuzlaşdı və həftəni bu səviyyədə başa vurdu. Təhlillərə əsasən  qiymətli metalın bir unsiya üzrə dəyəri 2000$ səviyyəsinin altında qalar və 1920$ həddini aşağıya doğru qırarsa, eniş tendensiyası daha da dərinləşə bilər.

 Məlumat investAZ şirkətinin analitikləri tərəfindən hazırlanıb.