ABŞ-da borc limiti gündəmi investorların diqqət mərkəzində qalarkən dollar indeksinin 103.85 bənd hədlərinə qədər gerilədiyi müşahidə olunub.

Ağ Ev və Respublikaçılar arasında borc limitinin artırılmasına dair prinsipial razılaşmaya baxmayaraq, Konqresdəki bürokratik prosesin qalan məhdud müddətdə tamamlanıb tamamlana bilməyəcəyi ilə bağlı  narahatlıqlar fonunda birjalarda risk iştahı zəif olaraq qalır.

Borc limiti üçün görülən tədbirlərin tükənməsinə və ölkədə nağd pul qıtlığının yaşanmasına günlər qalmış əldə edilən razılaşmadan sonra Nümayəndələr Palatasının sədri Kevin MakKarti borc limitinin 2025-ci il yanvarın 1-dək artırılmasını nəzərdə tutan qanun layihəsini çərşənbə günü səsverməyə çıxarılmasının planlaşdırıldığını açıqlayıb.

Makkarti verdiyi açıqlamada borc limitinin artırılması ilə bağlı qanun layihəsinin kifayət qədər sayda respublikaçının dəstəyini alacağına əmin olduğunu bildirib.

Nümayəndələr Palatasında Azlıqların Lideri Demokrat Hakem Cefriz də borc limiti qanun layihəsinin qəbulu üçün dəstək qazanmaqda problem görmədiyini qeyd edib.

Pul-kredit siyasəti cəbhəsində ABŞ Federal Ehtiyatlar Sisteminin (FED) faiz dərəcələrini daha 25 bənd artıracağına dair gözləntilər artarkən, FED rəsmilərinin açıqlamaları da birjalar tərəfindən izlənilir.

Riçmond FED sədri Tomas Barkin inflyasiyanın aşağı düşdüyünə əmin olmaq üçün tələbin soyuması əlamətlərini axtardığını bildirib. Barkin onu da əlavə edib ki, inflyasiyanın azaldılması çoxlarının gözlədiyindən daha çətin olacaq.

Digər tərəfdən, ABŞ-ın çip istehsalçısı Nvidia-nın səhmlərinin 3%-ə yaxın artması texnologiya paylarının artmasına səbəb oldu. Səhmlərinin artması ilə “Nvidia”-nın bazar dəyəri gün ərzində 1 trilyon dollara çatıb.

ABŞ-ın elektrikli avtomobil istehsalçısı Tesla-nın səhmləri də CEO Elon Maskın Çinin xarici işlər naziri Qin Qanq ilə görüşündən sonra 4%-dən çox dəyər qazanıb.

Makroiqtisadi məlumatlara gəldikdə, ABŞ-da “Conference Board” İstehlakçı Güvən İndeksi may ayında aylıq müqayisədə 1.4 bənd azalaraq 102.3 bənd olaraq açıqlanıb.

Ölkədə “S&P Case-Shiller” Milli Ev Qiymətlərii İndeksi də mart ayında aylıq müqayisədə 0.4%  artıb.

Bu gün isə Almaniyada açıqlanacaq İstehlak Qiymətləri İndeksi və Amerikada dərc oluanacaq “JOLTS” İş İmkanları və Kadr Dəyişikliklərinə dair məlumatlar investorların diqqət mərkəzində olacaq.

TƏhlik İnvestAZ şirkətinin analitikləri tərəfindən hazırlanıb.