"Bu gün biz Moskvada Ermənistanla Azərbaycan arasında münasibətlərə, eləcə də Qarabağ nizamlanmasına həsr olunmuş bir sıra görüşlər keçirdik. Əvvəlcə Azərbaycandan olan həmkarım Ceyhun Bayramov və Ermənistandan olan həmkarım Ararat Mirzoyanla ayrı-ayrılıqda ikitərəfli görüşlər oldu. Sonra üçümüz görüşdük. Biz Rusiya Federasiyasının Prezidenti Vladimir Putin, Azərbaycan Prezidenti İlham Əliyev və Ermənistanın Baş naziri Nikolay Paşinyan arasında əldə edilmiş razılaşmaların həyata keçirilməsi üzrə iş kontekstində yaranan vəziyyəti dəyərləndirdik".

Bu barədə Rusiya xarici işlər naziri Sergey Lavrovun üçtərəfli görüşün yekunları ilə bağlı XİN-in saytında yayımlanan şərhində bildirilib.

“Bu razılaşmalar Rusiya sülhməramlı kontingentinin məsuliyyət zonasında Qarabağda təhlükəsizliyin və sabitliyin təmin edilməsinə aiddir. Onlar həmçinin nəqliyyat və iqtisadi kommunikasiyaların açılmasına təsir göstərirlər. Bununla Rusiya, Ermənistan və Azərbaycan Baş nazirlərinin müavinlərinin rəhbərlik etdiyi üçtərəfli işçi qrup məşğul olur. Razılaşmalar humanitar məsələlərin həllini ehtiva edir. Söhbət ilk növbədə sərhədin delimitasiyası ilə onun sonradan demarkasiyasından gedir. Bunun üçün Rusiya, Azərbaycan və Ermənistan liderlərinin ayrıca bəyanatı ilə Rusiya tərəfinin məsləhətçi qismində iştirakı ilə delimitasiya üzrə Ermənistan-Azərbaycan komissiyası yaradılıb.

Ayrı bir mövzu sülh müqaviləsidir. Tərəflər bunun üzərində işləməyə başlayıblar və hazırda digər vasitəçilərin də iştirakı ilə aktiv şəkildə müzakirə olunur. Ermənistan və Azərbaycan nazirləri Vaşinqtona səfər ediblər, Ermənistan və Azərbaycan prezidentləri bir həftə əvvəl Brüsseldə olublar. Sülh müqaviləsi üzərində iş, əlbəttə ki, əsasdır. Amma bizim tərəfdaşlarımız bu gün təsdiqlədilər ki, delimitasiya məsələləri həll edilmədən, nəqliyyat və iqtisadi kommunikasiyalar açılmadan, Qarabağda və Ermənistan-Azərbaycan sərhədində təhlükəsizlik vəziyyəti ümumi yaxşılaşmadan sülh müqaviləsinin konkret aspektləri üzrə irəliləmək çətindir.

Bütün bunları kompleks şəkildə müzakirə etdik. Həmkarlar liderlərimizin qeyd olunan üçtərəfli bəyanatlarında əksini tapan ümumi səylərdə və qeyd etdiyim hər bir sahədə davam edən təmaslarda aparıcı rola görə Rusiya tərəfinə minnətdarlıqlarını bildiriblər”, - Lavrov qeyd edib.