Gədəbəydə qızıl hasilatı azalıb

Gədəbəydə qızıl hasilatı azalıb

Azərbaycanda qızıl, gümüş və mis hasilatı ilə məşğul olan Böyük Britaniyanın "Anglo-Asian Mining Plc." şirkəti bu ilin II rübündə Gədəbəy rayonu ərazisində 12 140 unsiya qızıl, 45 718 unsiya gümüş və 716 ton mis hasil edib.

Şirkətdən verilən xəbərə görə, ümumilikdə II rübdə qızıl ekvivalentində hasilat 14 775 unsiya təşkil edib.

VTB-də minimal faiz dərəcəsi ilə nağd kredit 10.49%-dən

Bu ilin ilk yarısında isə şirkət qızıl hasilatını ötən ilin analoji dövrü ilə müqayisədə 31% azaldıb və 23 218 unsiya qızıl hasil edib.

Hesabat dövründə gümüş hasilatı 6% azalaraq 85 087 unsiya, mis hasilatı isə 36% artaraq 1 322 ton olub.

Ümumilikdə, I yarımillikdə qızıl ekvivalentində 28 554 unsiya hasilatı qeydə alınıb və bu, ötən ilin analoji dövrünə nisbətən 22% azdır.

Qeyd edilir ki, bu il üçün qızıl ekvivalentində ümumi hasilat 64-72 min unsiya həcmində gözlənilir.

Bununla yanaşı bildirilir ki, II rübdə 7 406 unsiya qızıl külçələri 1 258 ABŞ dolları/unsiya qiyməti ilə satılıb.
Qeyd edək ki, “Anglo-Asian Mining” Azərbaycanda 1997-ci il avqustun 21-də imzalanmış PSA (Production Sharing Agreement/Hasilatın Pay Bölgüsü) tipli müqavilə çərçivəsində hasilatla məşğul olur. Müqavilə 6 yatağın - Naxçıvanda 1, Gədəbəydə 2, hazırda erməni işğalı altında olan Kəlbəcər və Zəngilanda 3 yatağın işlənməsini nəzərdə tutur. Müqavilədə Azərbaycanın payı 51%, Böyük Britaniyanın "Anglo-Asian Mining Plc." şirkətinin payı 49% təşkil edir. İlk qızıl hasilatına ("Gədəbəy" yatağında) 2009-cu ildə başlanılıb.

“Gədəbəy” bir-birinə inteqrasiya olunmuş mədənləri olan açıq mədəndir. Şirkət ərazidə yerləşən “Gadir” və “Gədəbəy” yatağından 50 km aralıdakı “Qoşa” yeraltı mədənlərində hasilatla məşğuldur. Ötən il Gədəbəy ərazisində “Uğur” qızıl yatağı kəşf olunub və buradan bu ilin sonuna qədər hasilata başlanması gözlənilir.

18.07.2017 11:11