Azərbaycan Mərkəzi Bankının sədri Taleh Kazımov bu gün keçirdiyi mətbuat konfransında jurnalistlərə səmimi şəkildə etiraf edib ki, daha çox şirkətin istiqraz buraxmamasının əsas səbəbi banklardaki izafi (artıq) vəsaitlərdir. 

Marja.az xəbər verir ki, Taleh Kazımov deyib: 

"Banklardakı izafi likvidliyi təhlil etmişik, səbəbini biz bilirik. Bunun üzərində işlərimiz gedir. Sizə səmimi deyim; şirkətlər tərəfindən istiqraz buraxılışlarının az olmasının səbəblərindən birincisi bank sektorunda böyük likvidliyin olmasıdır. Kapital bazarlarında aktivliyin aşağı olmasının səbəblərindən biri budur. Hüquqi şəxs vəsait cəlb etmək üçün istiqraz buraxmaq istəyəndə, banka da müraciət edib kredit götürə bilər. Əgər şirkət kapital bazarında istiqraz emissiya edə bilirsə, bu o deməkdir ki, korporativ idarəetməsi, maliyyə hesabatlılığı hamısı düzdür. Belə olan halda rahat şəkildə bankdan da borc götürə bilər. Bəs nə vaxt şirkətlər kapital bazarına üz tutacaqlar?! Mənim fikirimcə, həm bankların likvidliyi az olanda, həm də  kapital bazarında böyük investor bazası olanda, hansı ki, sərmayə yatırmağa hazırdırlar. Sözsüz ki, kapital bazarlarından maliyyələşmək istəyən şirkətlər də özlərinin maliyyə hesabatlılığını şəffaf qurmalıdırlar, korporativ idarəetməni təkmilləşdirməlidirlər".

Mərkəzi Bankın sədri əlavə edib ki, hazırda banklarda izafi likvidlik 5 milyard manata yaxındır:

"Kapital bazarı bank sektoru ilə böyük rəqabətdədir. Çünki təxminən hazırda banklarda 4,5-5 milyard manat civarında sərbəst vəsaitlər var. Banklar bu vəsaitləri hüquqi şəxslərə kredit kimi verməyə hazırdırlar. 5 milyard manat kifayət qədər böyük məbləğdir. Burada (izafi likvidliyin azaldılması üçün - red) kreditlərə də tələbin artmasını formalaşdırmaq lazımdır. Biz Mərkəzi Bank olaraq həmin izafi vəsaitləri sterilizasiya etməklə çalışacağıq ki, kapital bazarları da banklar ilə kreditləşmədə rəqabət apara bilsin. Banklarda likvidlik azalarsa, kredirləşmənin də sürəti azalacaq. Biz belə fərz edirik ki, bu zaman hüquqi şəxslər alternativ bazara - kapital bazarlarına - Bakı Fond Birjasına gələcəklər. Bu gün Bakı Fond Birjasında əsas investorlar  banklar və sığorta şirkətləridır. Yəni kimdə pul var. Bizim əhalidə kifayət qədər vəsaitlər var. Çalışırıq ki, tələb tərəfini inkişaf etdirək. Biz fərdi investorların sığortalanması mexanizmi üzərində çalışırıq. İnvestorlar rahat olmalıdırlar ki, onların investisiyaları investisiya şirkətlərinin müflis olmasından sığortalıdır. Bakı Fond Birjasının, Milli Depozit Mərkəzinin sistemləri də dəyişib, yeni qabaqcıl sistemlərdir. Bu da bazar iştirakçılarına imkan yaradır ki, artıq rəqəmsal kanalar ilə fərdi investorlara xidmətlər göstərsinlər. Tələb tərəfdə biz investor bazasını genişləndirməliyik. Təklif tərəfdə - hüquqi şəxslər, hansı ki, istiqraz və səhm emissiya edərək borc almaq istəyirlər, gərək Bakı Fond Birjasında investor bazası olsun. Ölkəmizdə yerli kredit reytinqi agentliyinin açılması müzakirə olunur. Hal-hazırda hüquqi, texniki və maliyyə analizləri aparılır. İnanıram ki, bu da kapital bazarının inkiaşfına böyük bir töhfə verəcək".